תפסיר רס"ג, במדבר לב

ומאשיה כת̇ירה כאנת לבני ראובן ולבני גד עט̇ימה ג̇דא פראו בלד יעזר ובלד גלעד פאד̇א בהמא מוצ̇ע מאשיה

פג̇או בני גד ובנו ראובן וקאלו למוסי ואלעזר אלאמאם ואשראף אלג̇מאעה קאילין

אן עטרות ודיבן ויעזר ונמרה וחשבון ואלעלה ושבם ונבו ובען

אלבלד אלד̇י פתחה אללה בין ידי ג̇מאעה בני אסראיל הו בלד יצלח ללמאשיה ולעבידך מאשיה

פאן וג̇דנא חט̇אא ענדך ידפע אלינא הד̇א אלבלד נחלה ולא תג̇זנא אלארדן

קאל להם מוסי הל אכ̇ותכם ימצ̇ון אלי אלחרב ואנתם תג̇לסון ההנא

ולם תג̇בנון קלוב בני אסראיל מן אלמציר אלי אלבלד אלד̇י אעטאהם אללה

כד̇א צנע אבאוכם חין בעת̇ת בהם מן רקים ברנע לירומו אלבלד

פבלגו אלי ואדי אלענקוד וראוה וג̇בנו קלוב בני אסראיל מן אן ידכ̇לו אלי אלבלד אלד̇י אעטאהם אללה

פאשתד גצ̇ב אללה פי ד̇לך אלוקת ואקסם קאילא

אן ירא אלרג̇אל אלד̇ין צעדו מן מצר מן אבן עשרין סנה פצאעדא אלבלד אלד̇י אקסמת אן אעטיה לאברהים ואסחק ויעקוב אד̇ לם יתבעו טאעתי

אלא כלב בן יפנה אלקנזי ויהושע בן נון פאנהמא אתבעא טאעה אללה

ולמא אשתד גצ̇ב אללה עליהם תוההם פי אלבריה ארבעין סנה אלי אן פני ג̇מיע אלג̇יל אלד̇י פעל אלשר בין ידיה

פהוד̇אכם קד קמתם מכאן אבאיכם עלי תעלים אלנאס אלכ̇טאיין לתזידו איצ̇א פי שדה גצ̇ב אללה עלי בני אסראיל

לאנכם אן רג̇עתם ען טאעתה זאד פי תרכהם פי אלבריה פתהלכון האולי אלקום אד̇א אמסכו ענכם

פתקדמו אליה וקאלו אנא נבני חט̇איר למואשינא ההנא וקרי לאטפאלנא

ונתג̇רד מסרעין בין ידי בני אסראיל אלי אן נוצלהם אלי מכאנהם פתקים אטפאלנא פי קרי חצינה מן קבל אהל אלבלד

לא נרג̇ע אלי ביותנא אלי אן יחוז כל סבט מן בני אסראיל נחלתה

לאן לא נחוז מעהם שיא מן עבר אלארדן אלי הנאך אד̇א קבצ̇נא נחלתנא מן עבר אלארדן שרקיא

קאל להם מוסי אן צנעתם הד̇א אלאמר ותג̇רדתם בין ידי אללה פי אלג̇יש

ועבר לכם כל מג̇רד פיכם אלארדן בין ידיה אלי אן יקרץ̇ אעדאה מן בין ידיה

פאד̇א פתח אלבלד בין ידיה פבעד ד̇לך תרג̇עון תכונו אבריא ענד אללה וענד אלאסראיל ויכון הד̇א אלבלד לכם חוזא בין ידיה

ואן לם תצנעו כד̇אך פקד אכ̇טאתם ללה פאעתרפו בכ̇טאיאכם אד̇א נאלתכם עקובתה

ואבנו לכם קרי לאטפאלכם וחט̇איר לגנמכם ומא כ̇רג̇ מן פמכם תצנעוה

קאלו לה עבידך יצנעון כמא יאמרהם סידנא

אטפאלנא ונסאונא ומואשינא וסאיר בהאימנא יקימון פי בלד אלג̇רש

ועבידך יעבר מנהם כל מג̇רד ללג̇יש בין אללה ללחרב כמא קאל סידנא

פאמר להם מוסי ואלעזר אלאמאם ויהושע בן נון וריסא אבא ג̇מאעה בני אסראיל

וקאל אן עברו מעכם אלארדן כל מג̇רד ללחרב בין ידי אללה חתי יפתח אלבלד בין ידיכם פאעטוהם בלד ג̇רש חוזא

ואן לם יעברו מג̇רדין מעכם פליחוזו פימא בינכם פי בלד כנעאן

פאג̇אבוה וקאלו ג̇מיע מא אמר אללה בה עבידך אנא צאנעון

פנחן נעבר מג̇רדין בין ידי אללה אלי בלד כנאען חתי יחצל לנא חוז נחלתנא מן עבר אלארדן

פאעטי מוסי בני גד ובני ראובן ונצף סבט מנשה אבן יוסף בלד ממלכה סיחון מלך אלאמוריין ובלד ממלכה עוג מלך אלבת̇ניה כל ארץ̇ מע קראהא אלתי עלי תכ̇מהא מסתדירא

פבני בנו גד דיבן ועטרת וערער

ועטרת שופן ויעזר ויגבהה

ובית נמרה ובית הרן קרי חצינה וחט̇איר גנם

ובנו ראובן בנו חשבון ואלעלא וקריתים

ונבו ובעל מעון מנקולה אסמאהן ושבמה וד̇לך אנהם סמו אלקרי אלתי בנוהא במא שאו

ת̇ם מצ̇ו בנו מכיר אבן מנשה אלי ג̇רש פפתחוהא וטרדו אלאמורי אלד̇י פיהא

ואעטי מוסי אלג̇רש למכיר אבן מנשה וסכנהא

ומצ̇י יאיר אבן מנשה ופתח סואדהן וסמאה סואד יאיר

ומצ̇י נבח פפתח קנת ורסאתיקהא וסמאהא נבח עלי אסמה