תפסיר רס"ג, במדבר טז

ותקדם קרח בן יצהר בן קהת בן לוי ודתן ואבירם אבנא אליאב ואון בן פלת בנו ראובן

פוקפו אמאם מוסי ואנאס מן בני אסראיל מאיתאן וכ̇מסון אשראף אלג̇מאעה דעאה מחצ̇ר ד̇וו אסמא

פתג̇וקו עלי מוסי והרון וקאלו להמא חסבכמא ריאסה אד̇ אלג̇מאעה כלהם מקדסון ופימא בינהם נור אללה פמא באלכמא תתשרפאן עלי ג̇וק אללה

פסמע ד̇לך מוסי ווקע עלי וג̇הה

פכלם קרח וכל ג̇מועה וקאל להם גדא יערף אללה מן הו לה ומן אלמקדס פיקרבה אליה ומן יכ̇תארה יקרבה אליה

אצנעו כ̇לה כ̇ד̇ו מג̇אמר קרח וכל ג̇מועה

ואג̇עלו עליהא נארא ואלקו פיהא בכ̇ורא בין ידי אללה גדא פאי רג̇ל אכ̇תארה אללה פהו אלמקדס חסבכם ד̇לך יא בני לוי

ת̇ם קאל מוסי להם אסמעו יא בני לוי

אקליל ענדכם אד̇ אפרזכם אלאה אסראיל מן ג̇מאעתהם פקרבכם אליה לתכ̇דמו כ̇דמה מסכנה ותקפו בין ידי אלג̇מאעה תכ̇דמונהם

פכד̇אך קרבך וסאיר אכ̇ותך בני לוי מעך חתי טלבתם אלאמאמה איצ̇א

לד̇לך אנת וכל ג̇מועך אלמג̇תמעון עלי אללה והרון מן הו חתי תתדמרו עליה

ת̇ם בעת̇ מוסי ידעו בדתן ואבירם אבני אליאב פקאלא לא נצעד

אקליל מא אצעדתנא מן בלד יפיץ̇ אללבן ואלעסל לתקתלנא פי אלבר חתי תתראס עלינא איצ̇א תרוסא

ואיצ̇א לם תדכ̇לנא אלי בלד יפיץ̇ לבנא ועסלא ולא אעטיתנא נחלה מן צ̇יעה וכרם פלו תהדדת האולאיך אלקום בקלע עיונהם לם נצר אליך

פאשתד ד̇לך עלי מוסי ג̇דא פקאל אללהם לא תקבל בכ̇ורהם ודל בה עלי אני לם אסכ̇ר לאחדהם חמארא פצ̇לא ען אני אסי אלי אחדהם

ת̇ם קאל מוסי לקרח אנת וג̇מועך אחצ̇רו בין ידי אללה מע הרון גדא

וליאכ̇ד̇ כל רג̇ל מג̇מרה ואלקו עליהא בכ̇ורה וקדמוהא בין ידי אללה מאיתין וכ̇מסין מג̇מרה ואנת והרון כל ואחד מג̇מרתה

פאכ̇ד̇ כל ואחד מג̇מרתה וג̇עלו פיהא נארא ואלקו עליהא בכ̇ורא ווקפו עלי באב כ̇בא אלמחצ̇ר ומוסי והרון

וג̇וק עליהם קרח ג̇מיע אלג̇מאעה אלי באב כ̇בא אלמחצ̇ר פט̇הר נור אללה לג̇מיעהם

וכלם אללה מוסי והרון תכלימא

אן אנפרזתמא מן בין הד̇ה אלג̇מאעה אפניתהם כטרפה

פוקעא עלי וג̇וההמא וקאלא יא טאיק יא אלאה ארואח כל בשרי ארג̇ל ואחד יכ̇טי ועלי כל אלג̇מאעה תסכ̇ט

וכלם אללה מוסי קאילא

מר אלג̇מאעה וקל להם ארתפעו ען חואלי מסכן קרח דתן ואבירם

פקאם מוסי ומצ̇י אלי דתן ואבירם ומצ̇ו מעה שיוך̇ בני אסראיל

פכלם אלג̇מאעה וקאל להם אעתזלו מן אכ̇ביה האולי אלקום אלט̇אלמין ולא תדנו בשי ממא הו להם כילא תנסאפו בג̇מיע כ̇טאיאהם

פארתפעו ען חואלי מסכן קרח דתן ואבירם והמא כ̇רג̇א איצ̇א פאנתצבא עלי באב כ̇באיהמא ונסאוהמא ובנוהמא ואטפאלהמא

פקאל מוסי בהד̇ה תעלמון אן אללה בעת̇ בי אן אעמל ג̇מיע הד̇ה אלאעמאל וליס מן תלקא נפסי

אן מאת האולי אלקום כמות כל אלנאס וטולבו במטאלבתהם פליס אללה בעת̇ בי

ואן כ̇לק אללה כ̇לקא אן תפתח אלארץ̇ פאהא פתבתלעהם וג̇מיע מא להם פינזלון אחיא אלי אלת̇רי עלמתם אן האולי אלקום קד עצו אללה

פכאן ענד פראגה מן קול הד̇א אלכלאם אנשקת אלארץ̇ אלתי תחתהם

ופתחת אלארץ̇ פאהא פאבתלעתהם וביותהם וכל אנסאן לקרח וג̇מיע אלסרח

פנזלו הם וג̇מיע מאלהם אחיא אלי אלת̇רי ותגטת עליהם אלארץ̇ ובאדו מן בין אלג̇וק

וג̇מיע בני אסראיל אלד̇ין חואליהם הרבו מן שדה צותהם לאנהם קאלו כילא תבתלענא אלארץ̇

ונאר כ̇רג̇ת מן ענד אללה ואחרקת אלמאיתין וכ̇מסין אלרג̇ל מקרבי אלבכ̇ור