תפסיר רס"ג, במדבר טו

ת̇ם כלם אללה מוסי תכלימא

מר בני אסראיל וקל להם אד̇א דכ̇לתם אלי בלד סכנאכם אלד̇י אנא מעטיכם הנאך

פקרבתם קרבאנא ללה צעידה או ד̇ביחא תסויג נד̇ר או תברעא או פי אעיאדכם וארדתם אן יכון מקבולא מרצ̇יא ללה מן אלבקר או מן אלגנם

פליקרב צאחב ד̇לך אלקרבאן מעה ללה מן אלבר עשר סמיד מלת̇ות̇ ברבע קסט דהן

וכ̇מרא ללמזאג̇ רבע קסט תצנעהא מע אלצעידה או מע אלד̇בח ללחמל אלואחד

וללכבש פקדם מן אלבר עשרין מן סמיד מלת̇ות̇ בת̇לת̇ קסט דהן

וכ̇מרא ללמזאג̇ ת̇לת̇ קסט תקרבה מקבולא מרצ̇יא ללה

ואן צנעת מן אלבקר צעידה או ד̇בחא תסויג נד̇ר או סלאמה ללה

פליקרב מעה מן אלבר ת̇לאת̇ה עשור מן סמיד מלת̇ות̇ בנצף קסט דהן

וכ̇מרא קרבה ללמזאג̇ נצף קסט קרבאנא מקבולא מרצ̇יא ללה

כד̇א יצנע מע כל ת̇ור ומע כל כבש ומע כל ראס מן אלחמל או מן אלמאעז

בחסב אחצא מא תקרבון כד̇אך אצנעו מע כל ואחד מן אלמחציין

כד̇א יצנע כל צריחי אד̇א קרב קרבאנא מקבולא מרצ̇יא ללה

ואי דכ̇יל דכ̇ל מעכם או סכן פימא בינכם עלי מר אג̇יאלכם פעמל קרבאנא אראד אן יכון מקבולא מרצ̇יא ללה פכמא תצנעון כד̇אך יצנע

יאיהא אלג̇וק רסם ואחד לכם וללגריב אלדכ̇יל רסם אלדהר עלי מר אג̇יאלכם כמא אן אלגריב מת̇לכם בין ידי אללה

כד̇אך שריעה ואחדה וחכם ואחד יכון לכם וללגריב אלדכ̇יל פימא בינכם

ת̇ם כלם אללה מוסי קאילא

מר בני אסראיל וקל להם אד̇א דכ̇לתם אלי אלבלד אלד̇י אנא מדכ̇לכם אליה

פמתי מא אכלתם מן טעאמה פארפעו רפיעה ללה

אול עג̇ינכם ג̇רדקה תרפעוהא רפיעה כרפיעה אלבד̇אר כד̇אך תרפעוהא

וכד̇אך מן אול עג̇ינכם תג̇עלו ללה רפיעה עלי מר אג̇יאלכם

ואן סהותם פלם תעמלו הד̇ה אלוצאיא אלתי אמר אללה בהא מוסי

מת̇ל ג̇מיע מא אמר אללה בה עלי יד מוסי מן יום אבתדי באלאמר והלם אלי אג̇יאלכם

פאן כאן אלסהו ען עיון אלג̇מאעה פליצנעו רת̇א מן אלבקר צעידה מקבולא מרצ̇יא ללה ומעה בר ומזאג̇ כמא יג̇ב ועתוד מן אלמאעז ללד̇כוה

ויסתגפר אלאמאם ען ג̇מאעה בני אסראיל פיגפר להם אד̇ ד̇לך סהו והם פאתו בצעידתהם קרבאנא ללה וד̇כותהם בין ידי אללה עלי סהוהם

פיגפר לג̇מאעה בני אסראיל וללגריב אלדכ̇יל פימא בינהם אד̇ ג̇מיע אלקום עלי סהו

ואן אכ̇טא אנסאן ואחד כד̇לך סהוא פליקרב שאה אבנה סנתהא ללד̇כוה

פיסתגפר אלאמאם ען ד̇לך אלאנסאן אלסאהי עלי מא אכ̇טא סהוא בין ידי אללה פיגפר לה ויצפח ענה

אלצריח מן בני אסראיל ואלגריב אלדכ̇יל פימא בינהם שריעה ואחדה תכון לכם למן יכ̇טי סהוא

ואי אנסאן צנע ד̇לך ביד רפיעה מן אלצריח ואלדכ̇יל פהו קד̇ף רבה וינקטע ד̇לך אלאנסאן מן בין קומה

למא אזדרא בכלאם אללה ופסך̇ עהדה פינקטע ד̇לך אלאנסאן אנקטאעא וחרה עליה

ולמא אקאם בנו אסראיל פי אלבר וג̇דו רג̇לא יחתטב חטבא פי יום אלסבת

פקדמוה אלד̇ין וג̇דוה יחתטב חטבא אלי מוסי והרון וסאיר אלג̇מאעה

ווצ̇עוה פי אלחבס לאנה לם יפסר להם מא יצנע בה

פקאל אללה למוסי יקתל אלרג̇ל קתלא וד̇לך אן ירג̇מוה באלחג̇ארה ג̇מיע אלג̇מאעה כ̇ארג̇ אלעסכר

פכ̇רג̇וה כ̇ארג̇ אלעסכר ורג̇מוה באלחג̇ארה חתי מאת כמא אמר אללה מוסי

וקאל אללה למוסי קאילא

מר בני אסראיל וקל להם אן יצנעו להם ד̇ואבה עלי אכנאף אזרהם עלי מר אג̇יאלהם ויג̇עלו עלי ד̇ואבה אלכנף סלך אסמאנג̇ון

פיכון ד̇לך לכם ד̇ואבה ט̇אהרה תרוהא פתד̇כרו ג̇מיע וצאיא אללה ותעמלוהא ולא תרומו אתבאע קלובכם ועיונכם אלתי אנתם טאגון וראהא

לכי תד̇כרו ד̇לך דאימא ותעמלו ג̇מיע וצאיאי פתכונו מקדסין לאלאהכם

אנא אללה רבכם אלד̇י אכ̇רג̇תכם מן בלד מצר לאכון לכם אלאהא אנא אללה רבכם אלדאים אלבקא