תפסיר רס"ג, ויקרא ט

פלמא כאן אליום אלת̇אמן דעא מוסי בהרון ובניה ואשיאך̇ אסראיל

פקאל להרון כ̇ד̇ עג̇לא מן בקר ללד̇כוה וכבשא ללצעידה צחיחין וקרבהמא בין ידי אללה

ומר בני אסראיל קאילא כ̇ד̇ו עתודא מן אלמאעז ללד̇כוה ועג̇לא וכבשא אבני סנה צחאחא ללצעידה

ות̇ורא וכבשא ללסלאמה יד̇בחאן בין ידי אללה והדיה מלת̇ות̇ה בדהן לאן הד̇א אליום אללה מתג̇ל לכם

פקדמו מא אמר בה מוסי אלי באב כ̇בא אלמחצ̇ר ותקדם ג̇מיע אלג̇מע ווקפו בין ידי אללה

קאל מוסי הד̇א אלאמר אלד̇י אמר אללה אעמלוה ויתג̇לי לכם נור אללה

פקאל מוסי להרון תקדם אלי אלמד̇בח ואעמל ד̇כותך וצעידתך ואסתגפר ענך וען קומך ואעמל קרבאן אלקום ואסתגפר ענהם כמא אמר אללה

פתקדם הרון אלי אלמד̇בח פד̇בח עג̇ל אלד̇כוה אלד̇י לה

פקדם בנו הרון אלדם אליה פגמס אצבעה פיה וג̇על עלי ארכאן אלמד̇בח ובאקי אלדם צב ענד אסאס אלמד̇בח

ואלת̇רב ואלכלי וזיאדה אלכבד מן אלד̇כוה קתר ד̇לך עלי אלמד̇בח כמא אמר אללה מוסי

ולחמה וג̇לדה אחרקהמא באלנאר כ̇ארג̇ אלעסכר

ת̇ם ד̇בח אלצעידה ובלגו בנו הרון אלדם אליה ורשה אלי אלמד̇בח מסתדירא

ת̇ם בלגו אליה אעצ̇א אלצעידה מע אלראס וקתר ד̇לך עלי אלמד̇בח

וגסל אלג̇וף ואלאכארע וקתר ד̇לך מע אלצעידה עלי אלמד̇בח

ת̇ם קדם קרבאן אלקום פאכ̇ד̇ עתוד אלד̇כוה אלד̇י ללקום פד̇בחה וד̇כא בה כאלאול

וקדם אלצעידה וצנעהא כאלסירה

ת̇ם קדם אלהדיה ומלא כפה מנהא וקתר ד̇לך עלי אלמד̇בח מא כ̇לא צעידה אלגדאה

וד̇בח אלת̇ור ואלכבש ד̇באיח אלסלאמה אלתי ללקום ובלגו בנו הרון אליה אלדם ורשה עלי אלמד̇בח מסתדירא

ואלשחום מן אלת̇ור ומן אלכבש אלאליה ואלמגשי ואלכלי וזיאדה אלכבד

פג̇עלו אלשחום מע אלקצוץ וקתר אלשחום עלי אלמד̇בח

ואלקצוץ ואלסאק אלאימאן חרכהא הרון תחריכא בין ידי אללה כמא אמר מוסי

ת̇ם שאל הרון ידיה אלי אלקום ובארך עליהם בעד אן נזל מן עמל אלד̇כוה ואלצעידה וד̇בח אלסלאמה

ת̇ם דכ̇ל מוסי והרון אלי כ̇בא אלמחצ̇ר וכ̇רג̇א ובארכא אלקום ותג̇לי ללקום נור אללה

באן כ̇רג̇ת נאר מן ענד אללה פאכלת עלי אלמד̇בח אלצעידה ואלשחום פנט̇ר אלקום ורנו ווקעו עלי וג̇וההם