תפסיר רס"ג, ויקרא ח

ת̇ם כלם אללה מוסי קאילא

קדם הרון ובניה מעה ואלת̇יאב ודהן אלמסוחיה ורת̇ אלד̇יכוה ואלכבשין ואלסל אלפטיר

וג̇מיע אלג̇מע ג̇וקה אלי באב כ̇בא אלמחצ̇ר

פצנע מוסי כמא אמרה אללה פתג̇וק אלג̇מע אלי באב כ̇בא אלמחצ̇ר

וקאל להם מוסי הד̇א אלאמר אלד̇י אמר אללה אן יעמל

פקדם הרון ובניה פגסלהם באלמא

וג̇על עליה אלתוניה וקלדה באלזנאר ואלבסה אלממטר וג̇על עליה אלצדרה ושדדה בהמיאנהא וקלדה בה

וציר עליה אלבדנה וג̇על פיהא אלאנואר ואלצחאיח

וציר אלעמאמה עלי ראסה וג̇על דונהא ממא ילי וג̇הה עצאבה אלד̇הב תאג̇ אלקדס כמא אמר אללה מוסי

ואכ̇ד̇ מוסי דהן אלמסוחיה ומסח מנה אלמסכן וג̇מיע מא פיה וקדסהם

ונצ̇ח מנה עלי אלמד̇בח סבע מראר ומסח אלמד̇בח וג̇מיע אניתה ואלחוץ̇ ומקעדה וקדסהם

וצב מן דהן אלמסוחיה עלי ראס הרון ומסחה וקדסה

וקדס מוסי בני הרון ואלבסהם תואניא וקלדהם בזנאניר וצ̇מדהם בקלאנס כמא אמר אללה מוסי

ת̇ם קדם רת̇ אלד̇כוה ואסנד הרון ובנוה אידיהם עלי ראסה

פד̇בחה מוסי ואכ̇ד̇ מן דמה וג̇על עלי ארכאן אלמד̇בח מסתדירא באצבעה וד̇כאה ובאקי אלדם צבה ענד אסאסה וקדסה ואסתגפר ענה

ואכ̇ד̇ מוסי ג̇מיע אלת̇רב אלד̇י עלי אלג̇וף וזיאדה אלכבד ואלכליתין ושחמהמא וקתר עלי אלמד̇בח

ואלרת̇ מע ג̇לדה ולחמה מע פרת̇ה אחרק באלנאר כ̇ארג̇ אלעסכר כמא אמר אללה מוסי

ת̇ם קרב כבש אלצעידה פאסנד הרון ובנוה אידיהם עלי ראסה

פד̇בחה מוסי ונצ̇ח אלדם עלי אלמד̇בח מסתדירא

ועצ̇א מוסי אלכבש אעצ̇אא וקתר אלראס ואלאעצ̇א ואלקצבה

ואלג̇וף ואלאכארע נסלהא באלמא וקתר מוסי ג̇מיע אלכבש עלי אלמד̇בח הו צעידה מקבול מרצ̇י קרבאן ללה כמא אמר אללה מוסי

ת̇ם קדם אלכבש אלת̇אני כבש אלכמאל ואסנד הרון ובנוה אידיהם עלי ראסה

פד̇בחה מוסי ואכ̇ד̇ מן דמה פג̇על עלי שחמה אד̇ן הרון אלימני ועלי בהאם ידה אלימני ובהאם רג̇לה אלימני

ת̇ם קדם בני הרון וג̇על מן אלדם עלי אשחאם אד̇אנהם אלאיאמן ואבאהם ארג̇להם אלאיאמן ורש מוסי באקי אלדם עלי אלמד̇בח מסתדירא

ואכ̇ד̇ אלת̇רב ואלאליה וג̇מיע אלשחם אלד̇י עלי אלג̇וף וזיאדה אלכבד ואלכליתין ושחמהמא ואלסאק אלאימן

ומן אלסל אלפטיר אלד̇י בין ידי אללה אכ̇ד̇ ג̇רדקה פטירה ואחדה וג̇רדקה כ̇בז מדהונה ואחדה ורקאקה וצירהא עלי אלשחום ואלסאק אלאימן

וג̇על אלכל עלי ידי הרון ועלי ידי בניה וחרכהא תחריכא ללה

ת̇ם אכ̇ד̇הא מוסי מן פוק אידיהם וקתרהא עלי אלמד̇בח מע אלצעידה לאנהא קרבאן כמאל ללה מקבול מרצ̇י

ת̇ם אכ̇ד̇ מוסי אלקץ וחרכה תחריכא בין ידי אללה וכאן למוסי נציבא מן כבש אלכמאל כמא אמר אללה מוסי

ת̇ם אכ̇ד̇ מוסי מן דהן אלמסוחיה ומן אלדם אלד̇י עלי אלמד̇בח פנצ̇ח עלי הרון ות̇יאבה ובניה ות̇יאב בניה מעה וקדסהם אג̇מעין

וקאל מוסי להרון ובניה אטבכ̇ו אללחם ענד באב כ̇בא אלמחצ̇ר ות̇ם איצ̇א פכלוה מע אלכ̇בז אלד̇י פי סל אלכמאל כמא אמרת וקלת הרון ובנוה יאכלוה

ומא פצ̇ל מן אללחם ואלכ̇בז פאחרקוה באלנאר

ומן באב כ̇בא אלמחצ̇ר לא תכ̇רג̇ו סבעה איאם אלי יום פראג איאם כמאלכם פאן סבעה איאם תכמל ואג̇בכם

וכמא עמל בכם אליום כ̇דאך אמר אללה אן יעמל ויסתגפר ענכם

וענד באב כ̇בא אלמחצ̇ר תג̇לסו לילא ונהארא סבעה אימם ותחפט̇ו חפט̇ אללה ולא תהלכו לאן כד̇אך אמרת

וצנע הרון ובנוה בג̇מיע אלאמור אלתי אמר אללה מוסי