תפסיר רס"ג, בראשית כג

וכאן עמר סארה מאיה וסבע ועשרין סנה סני חיותהא

ומאתת סארה פי קריה ארבע הי חברי פי בלד כנעאן פאקבל אברהים ינדבהא ויבכיהא

ת̇ם קאם אברהים מן חצ̇רה מיתה וכלם בני חת קאילא

אנא גריב וצ̇יף מעכם אעטוני חוז קבר מעכם ואדפן מיתי מן בין ידי

פאג̇אבו בנו חת לאברהים וקאלו לה

אסמע מנא יא סידנא אנת שריף אללה פי מא ביננא פי כ̇יר קבורנא אדפן מיתך וכל רג̇ל מנא לא יבכ̇ל עליך בקבר לה אן תדפן פיה מיתך

פקאם אברהים וסג̇ד שכרא לאהל אלבלד בני חת

ת̇ם כלמהם וקאל להם אן שאת אנפסכם אן אדפן מיתי מן בין ידי אסמעו מני ואשפעו לי ענד עפרון בן צחר

פי אן יעטיני אלמגארה אלמצ̇אעפה אלתי לה אלתי פי טרף צ̇יעתה בת̇מן כאמל יעטיניהא פי מא בינכם חוז קבר

ועפרון ג̇אלס פי מא בין בני חת פאג̇אב עפרון אלחתי לאברהים בחצ̇רה בני חת וסאיר מן דכ̇ל פי באב קריתה קאילא

לא יא סידי אסמע מני אלצ̇יעה קד אעטיתהא לך ואלמגארה אלתי פיהא בחצ̇רה בני קומי אעטיתהא לך אדפן מיתך

פסג̇ד אברהים שכרא בחצ̇רה אהל אלבלד

ת̇ם כלם עפרון בחצ̇רתהם קאילא אמא אן אנת ליתך תסמע מני ואעטיך ת̇מן אלצ̇יעה אקבלהא מני חתי אדפן מיתי ת̇ם

פאג̇אבה עפרון וקאל לה

יא סידי אסמע מני רוצ̇ה תסאוי ארבע מאיה מת̇קאל פצ̇ה מא הי ביני ובינך אדפן פיהא מיתך

פלמא סמע אברהים ד̇לך מנה וזן לה אלפצ̇ה אלתי ד̇כרהא בחצ̇רה בני חת ארבע מאיה מת̇קאל פצ̇ה ג̇איזה פי אלתג̇אראת

פוג̇בת צ̇יעה עפרון אלמערופה באלמצ̇אעפה אלתי בחצ̇רה ממרא אלצ̇יעה ואלמגארה אלתי פיהא וג̇מיע אלשג̇ר אלתי פיהא ופי ג̇מיע תכ̇מהא מסתדירא

שראא לאברהים בחצ̇רה בני חת וסאיר מן דכ̇ל מן באב קריתהם

בעד ד̇לך דפן אברהים סארה זוג̇תה פי מגארה אלצ̇יעה אלמצ̇אעפה בחצ̇רה ממרא הי חברא פי בלד כנעאן

פוג̇בת אלצ̇יעה ואלמגארה אלתי פיהא לאברהים חוז קבר מן בני חת