תפסיר רס"ג, בראשית כב

פלמא כאן בעד הד̇ה אלאמור אמתחן אללה אברהים וקאל לה יא אברהים קאל לביך

קאל כ̇ד̇ אבנך וחידך אלד̇י תחבה הו אסחק ואמץ̇ בה אלי בלד אלעבאדה ואצעדה ת̇ם קרבאנא עלי אחד אלג̇באל אלד̇י אקול לך

ואדלג̇ אברהים באלגדאה ואסרג̇ חמארה ואכ̇ד̇ גלאמיה מעה ואסחק אבנה ושקק חטבא ללקרבאן וקאם ומצ̇א אלי אלמוצ̇ע אלד̇י קאל לה אללה

ולמא כאן פי אליום אלת̇אלת̇ רפע אברהים עיניה וראי אלמוצ̇ע מן בעיד

פקאל אברהים לגלאמיה אג̇לסא הנא מע אלחמאר ואנא ואלגלאם נמצ̇י אלי ההנא ונסג̇ד ונרג̇ע אליכמא

פאכ̇ד̇ אברהים חטב אלקרבאן וצירה עלי אסחק אבנה ואכ̇ד̇ בידיה אלנאר ואלסכין ומצ̇יא ג̇מיעא

וקאל אסחק לאברהים אביה וקאל לה יא אבתאה קאל לביך יא בני קאל הוד̇א אלנאר ואלחטב ואין אלחמל ללקרבאן

קאל אברהים אללה יט̇הר אלחמל ללקרבאן יא בני ומצ̇יא ג̇מיעא

חתי ג̇או אלי אלמוצ̇ע אלד̇י קאל לה אללה פבנא ת̇ם אברהים אלמד̇בח ונט̇ם אלחטב וכתף אסחק אבנה וצירה עלי אלמד̇בח פוק אלחטב

ומד אברהים ידיה ואכ̇ד̇ אלסכין ליד̇בח אבנה

פנאדאה מלאך אללה מן אלסמא וקאל יא אברהים יא אברהים קאל לביך

פקאל לא תמד ידך אלי אלגלאם ולא תצנע בה שיא פאני אלאן ערפת אלנאס אנך תקי אללה ולם תצד אבנך וחידך עני

ת̇ם רפע אברהים עיניה בעד ד̇לך פאד̇א בכבש מלתחמה פי שעב אלשג̇רה קרנאה פמצ̇י פאכ̇ד̇ה פקרבה קרבאנא בדל אבנה

וסמי אברהים ד̇לך אלמוצ̇ע אללה יתג̇לא כמא יקאל אליום פי הד̇א אלג̇בל אללה יתג̇לא

ת̇ם נאדא מלאך אללה באברהים ת̇אניה מן אלסמא

וקאל באסמי קסמת יקול אללה אנך לאג̇ל מא צנעת הד̇א אלאמר ולם תצדד אבנך וחידך עני

לאבארכן פיך ואכת̇רן נסלך ככואכב אלסמא וכאלרמל אלד̇י עלי שאטי אלבחר ויחוז נסלך קרי אעדאיה

ויתבארך בנסלך ג̇מיע אמם אלארץ̇ ג̇זא מא קבלת קולי

ת̇ם רג̇ע אברהים אלי גלאמיה פקאמו ומצ̇ו אג̇מעין אלי ביר סבע ואקאם ת̇ם

פלמא כאן בעד הד̇ה אלאמור אכ̇בר אברהים וקיל לה הוד̇א קד ולדת מלכה הי איצ̇א בנין לנחור אכ̇יך

עוץ בכרה ובוז אכ̇אה וקמואל אבא ארם

וכשד וחזו ופלדש וידלף ובתואל

ובתואל אולד רבקה האולי אלת̇מאניה ולדתהם מלכה לנחור אכ̇י אברהים

ואמתה אסמהא ראומה וולדת איצ̇א הי טבח וגחם ותחש ומעכה