תפסיר רס"ג, בראשית ב

כמלת אלסמא ואלארץ̇ וג̇מיע ג̇יושהם

ואכמל אללה פי אליום אלסאבע כ̇לקה אלד̇י צנעה ועטל פיה אן יכ̇לק שיא מן מת̇ל כ̇לקה אלד̇י צנעה

ובארך פיה וקדסה אד̇ עטל פיה אן יכ̇לק שיא מן מת̇ל כ̇לקה אלד̇י צנעה

הד̇א שרח נואשי אלסמאואת ואלארץ̇ אד̇ כ̇לקתא פי וקת צנע אללה אלארץ̇ ואלסמא

ואן ג̇מיע שג̇ר אלצחרא קבל אן יכון פי אלארץ̇ וג̇מיע עשבהא קבל אן ינבת אד̇ לם ימטר אללה עליהא ולא אנסאן כאן יפלחהא

ולא בכ̇אר כאן יצעד מנהא פיסקי ג̇מיע וג̇ההא

ואן אללה כ̇לק אדם תראבא מן אלארץ̇ ונפך̇ פי אנפה נסמה אלחיוה פצאר אדם נפסא נאטקה

וגרס אללה ג̇נאנא פי עדן שרקיא וציר ת̇ם אדם אלד̇י כ̇לקה

ואנבת אללה מן אלארץ̇ כל שג̇רה חסן מנט̇רהא וטיב מאכלהא ושג̇רה אלחיוה פי וסט אלג̇נאן ושג̇רה מערפה אלכ̇יר ואלשר

ונהר יכ̇רג̇ מן עדן יסקי אלג̇נאן ומן ת̇ם יפתרק ויציר לארבעה רוס

אסם אחדהא אלניל והו מחיט בג̇מיע בלד זוילה אלד̇י ת̇ם אלד̇הב

וד̇הב ד̇לך אלבלד ג̇יד ת̇ם אללולו וחג̇ארה אלבלור

ואסם אלנהר אלת̇אני גיחון והו מחיט בג̇מיע בלד אלחבשה

ואסם אלנהר אלת̇אלת̇ אלדג̇לה והו יסיר פי שרקי אלמוצל ואלנהר אלראבע הו אלפראת

ואכ̇ד̇ אללה אדם ואנזלה פי ג̇נאן עדן ליפלחהא וליחפט̇הא

ואמר אללה אדם קאילא מן ג̇מיע שג̇ר אלג̇נאן ג̇איז אן תאכל

ומן שג̇ר מערפה אלכ̇יר ואלשר לא תאכל פאנך פי יום תאכל מנהא תסתחק אן תמות

וקאל אללה לא כ̇יר פי בקא אדם וחדה אצנע לה עונא חד̇אה

פחשר אללה מן אלארץ̇ ג̇מיע וחש אלצחרא וטאיר אלסמא ואתי בהא אלי אדם לירא מא יסמיהא פכל מא סמאה אדם מן נפס חיה הו אסמה אלי אלאן

פסמא אדם אסמא לג̇מיע אלבהאים וטאיר אלסמא וג̇מיע וחש אלצחרא ולם יג̇ד אדם עונא חד̇אה

פאוקע אללה סבאתא עלי אדם לילא יחס פנאם ואסתל אחדי אצ̇לאעה וסד מכאנה בלחם

ובנא אללה אלצ̇לע אלתי אכ̇ד̇ אמראה פאתי בהא אלי אדם

פקאל אדם הד̇ה אלמרה שאהדת עט̇מא מן עט̇אמי ולחמא מן לחמי וינבגי אן תסמא אמראה לאנהא מן אמר אכ̇ד̇ת

לד̇לך יתרך אלרג̇ל אבאה ואמה וילזם זוג̇תה פיציראן כג̇סד ואחד

וכאנא ג̇מיעא עריאנין אדם וזוג̇תה ולא יחתשמאן מן ד̇לך