תפסיר רס"ג, בראשית א

אול מא כ̇לק אללה אלסמאואת ואלארץ̇

ואלארץ̇ כאנת גאמרה ומסתבחרה וט̇לאם עלי וג̇ה אלגמר וריח אללה תהב עלי וג̇ה אלמא

ושא אללה אן יכון נור פכאן נור

פלמא עלם אללה אן אלנור ג̇יד פצל אללה בין אלנור ובין אלט̇לאם

וסמא אללה אוקאת אלנור נהארא ואוקאת אלט̇לאם סמאהא לילא ולמא מצ̇י מן אלליל ואלנהאר יום ואחד

שא אללה אן יכון ג̇לד פי וסט אלמא ויכון פאצלא בין מאיין

פצנע אללה אלג̇לד ופצל בין אלמא אלד̇י מן דונה ובין אלמא אלד̇י מן פוקה פכאן כד̇אך

וסמא אללה אלג̇לד סמאא ולמא מצ̇י מן אלליל ואלנהאר יום ת̇אן

שא אללה אן תג̇תמע אלאמיא מן תחת אלסמא אלי מוצ̇ע ואחד ויט̇הר אליבס פכאן כד̇אך

פסמא אללה אליבס ארצ̇א ומלאם אלמא סמאהא בחארא פעלם אללה אן ד̇לך ג̇יד

ושא אללה אן תכלא אלארץ̇ כלאא ועשבא ד̇א חב ושג̇רא ד̇א ת̇מר מכ̇רג̇ ת̇מר לאצנאפה מא גרסה מנה עלי אלארץ̇ וכאן כד̇אך

ואכ̇רג̇ת אלארץ̇ כלאא ועשבא ד̇א חב לאצנאפה ושג̇רא מכ̇רג̇ ת̇מר מא גרסה מנה לאצנאפה פעלם אללה אן ד̇לך ג̇יד

ולמא מצ̇י מן אלליל ואלנהאר יום ת̇אלת̇

שא אללה אן תכון אנואר פי ג̇לד̇ אלסמא ותפרז בין אלנהאר ואלליל פיכונאן איאת ואוקאתא ואיאמא וסנין

ותכון אלאנואר פי ג̇לד̇ אלסמא לתצ̇י עלי אלארץ̇ פכאן כד̇אך

פצנע אללה אלנירין אלעט̇מין אלניר אלאכבר ללאצ̇אה פי אלנהאר ואלניר אלאצגר ללאצ̇אה פי אלליל ואלכואכב

וג̇עלהם אללה פי ג̇לד̇ אלסמא ליצ̇ו עלי אלארץ̇

וללאצ̇אה פי אלנהאר ופי אלליל ואלתפרד בין אלנור ואלט̇לאם פעלם אללה אן ד̇לך ג̇יד

ולמא מצ̇י מן אלליל ואלנהאר יום ראבע

שא אללה אן יסעי מן אלמא סאע ד̇ו נפס חיה וטאיר יטיר עלי אלארץ̇ קבאלה ג̇לד אלסמא

פכ̇לק אללה אלתנאנין אלעט̇אם וסאיר אלנפוס אלחיה אלדאבה אלתי סעת מן אלמא לאצנאפהא וכל טאיר ד̇י ג̇נאך̇ לאצנאפה פעלם אללה אן ד̇לך ג̇יד

ובארך אללה פיהם וקאל להם חכמא את̇מרו ואכת̇רו ועמו אלמא פי אלבחאר ואלטאיר יכת̇ר פי אלארץ̇

ולמא מצ̇י מן אלליל ואלנהאר יום כ̇אמס

שא אללה אן תכ̇רג אלארץ̇ נפוסא חיה לאצנאפהא בהאים ודביבא ווחש אלארץ̇ לאצנאפה וכאן כד̇אך

וצנע אללה וחש אלארץ̇ לאצנאפה ואלבהאים לאצנאפהא וסאיר דביב אלארץ̇ לאצנאפה פעלם אללה אן ד̇לך ג̇יד

וקאל אללה נצנע אנסאנא בצורתנא כשבהנא מסלטא יסתולון עלי סמך אלבחר וטאיר אלסמא ואלבהאים וג̇מיע אלארץ̇ וסאיר אלדביב אלדאב עליהא

פכ̇לק אללה אדם בצורתה בצורה שריפה מסלטא כ̇לקה ד̇כרא ואנת̇י כ̇לקהמא

ובארך פיהמא אללה וקאל להמא את̇מרו ואכת̇רו ועמו אלארץ̇ ואמלכוהא ואסתולו עלי סמך אלבחר וטאיר אלסמא וסאיר אלחיואן אלדאב עלי אלארץ̇

וקאל אללה הוד̇א קד אעטיתכם כל עשב ד̇י חב אלד̇י עלי וג̇ה ג̇מיע אלארץ̇ וכל שג̇ר פיה ת̇מר ד̇ו חב יכון לכם טעאמא

ולג̇מיע וחש אלארץ̇ וג̇מיע טאיר אלסמא וסאיר מא דב עלי אלארץ̇ אלד̇י פיה נפס חיה אלי אן ג̇מיע כ̇צ̇ר אלעשב מאכלא פכאן כד̇אך

ולמא עלם אללה אן ג̇מיע מא צנעה ג̇יד ג̇דא ולמא מצ̇י מן אלליל ואלנהאר יום סאדס