תפסיר רס"ג, בראשית יט

ת̇ם דכ̇ל אלמלכאן אלי סדום וקת אלעשא ולוט ג̇אלס עלי באב סדם פלמא ראהמא קאם תלקאהמא וסג̇ד עלי וג̇הה עלי אלארץ̇

וקאל ברגבה יה סידי מילא אלאן אלי בית עבדכמא וביתא ואגסלא ארג̇לכמא ותדלג̇אן ותמצ̇אן פי טריקכמא קאלא לא אלא פי אלרחבה נבית

חתי אלח עליהמא ג̇דא פמאלא אליה ודכ̇לא מנזלה פצנע להם מג̇לסא וכ̇בז פטירא פאכלו

קבל אן ינצ̇ג̇עו פאד̇א באהל אלקריה אהל סדום קד אחאטו באלמנזל מן שאב אלי שיך̇ וג̇מיע אלקום אלד̇י פי נאחיתה

פדעו בלוט וקאלו לה אין אלקום אלד̇ין דכ̇לו אליך אלילה אכ̇רג̇הם אלינא חתי נואקעהם

פכ̇רג̇ אליהם לוט אלי אלבאב וסד אלמצראע וראה

קאל יא אכ̇ותי לא תסיו אליהם

הוד̇א לי אבנתאן לם יערפא רג̇לא אכ̇רג̇המא אליכם ואצנעו בהמא מא חסן ענדכם עדא להאולי אלקום לא תצנעו שיא לאנהם דכ̇לו תחת ט̇ל סקפי

פקאלו תקדם אלי ההנא ת̇ם קאלו ואחד ג̇א ליסכן מענא וצאר יחכם עלינא אלאן נסי אליך אכת̇ר מנהם פאלחו עלי לוט ג̇דא ותקדמו ליכסרו אלמצראע

פמד אלקום אידיהם ואדכ̇לו לוט אליהם אלי אלבית וגלקו אלמצראע

ואלקום אלד̇י בבאב אלבית צ̇רבוהם באלעשא מן שאב אלי שיך̇ פעג̇צו ען וג̇וד אלבאב

וקאלו אלקום ללוט מן לך ההנא איצ̇א מן צהר ובניך ובנאתך וג̇מיע מא לך פי אלבלד אכ̇רג̇ה מן הד̇א אלמוצ̇ע

לאנא מהלכון הד̇א אלמוצ̇ע למא עט̇ם צראכ̇הם בין ידי אללה פבעת̇נא לנהלכהם

פכ̇רג̇ לוט וכלם אצהארה אלמתזוג̇ן בבנאתיה וקאל להם קומו אכ̇רג̇ו מן הד̇א אלמוצ̇ע לאן אללה מהלכה פכאן ענדהם כאללאעב

פלמא כאן ענד טלוע אלפג̇ר אלח אלמלאיכה עלי לוט קאילין קם כ̇ד̇ זוג̇תך ואבנתיך אלמוג̇ודתין כילא תנסאף בד̇נוב אהל אלבלד

פתלבת̇ ואמסך אלקום בידה וביד זוג̇תה ויד אבנתיה בשפקה אללה עליה פאכ̇רג̇וה וודעוה כ̇ארג̇ אלקריה

פלמא אכ̇רג̇הם אלי ברא קאל לה אנג̇ בנפסך לא תלתפת וראך ולא תקף פי שי מן אלמרג̇ ותכ̇לץ אלי אלג̇בל כילא תנסאף

פקאל לוט להמא ברגבה לא יא רסולי אללה

הוד̇א קד וג̇ד עבדך חטיא ענדך וכת̇רת פצ̇לך אלד̇י צנאעתה מעי לתחיי נפסי ואנא לא אטיק אלתכ̇לץ אלי אלג̇בל כילא תלחקני אלבליה פאמות

הוד̇א הד̇ה אלקריה קריבה אן יהרב אליהא והי צגירה פאתכ̇לץ אליהא עלי אנהא צגירה ותחיא נפסי

קאל לה הוד̇א קד שפעתך פי הד̇א אלאמר איצ̇א לילא אקלב אלקריה אלתי סאלת פיהא

אסרע תכ̇לץ אלי ת̇ם פאני ליס אטיק אן אצנע שיא אלי אן תדכ̇להא אלי ת̇ם לד̇לך סמית אלקריה זגר

אלשמס כ̇רג̇ת עלי אלארץ̇ ולוט דכ̇ל אלי זגר

ואללה אמטר עלי סדום ועלי עמרה כבריתא ונארא מן ענדה מן אלסמא

פקלב תלך אלקרי וסאיר אלמרג̇ וג̇מיע סכאנהא חתי נבאת אלארץ̇

פאלתפתת זוג̇תה וראה פצארת נצבה מלח

פאדלג̇ אברהים באלגדאה אלי אלמוצ̇ע אלד̇י וקף ת̇ם בין ידי אללה

פאשרף עלי וג̇ה סדם ועמרה וסאיר ארץ̇ אלמרג̇ פנט̇ר פאד̇א קד צעד דכ̇אנהא כקתאר אלאתון

ולמא אהלך אללה קרי אלמרג̇ ד̇כר אללה אברהים פאטלק ללוט מן וסט אלמקלב בעד מא קלב אלקרי אלתי כאן יסכנהא לוט

פצעד לוט מן זגר ואקאם פי אלג̇בל ואבנתאה מעה אד̇ כ̇אף אן יקים פי זגר פקאם פי אלמגארה הו ואבנתאה

וקאלת אלכברי ללצגרי אבונא שיך̇ וליס רג̇ל פי אלבלד ידכ̇ל אלינא כסביל אלנאס

תעאלי נסקי אבאנא כ̇מרא ונצ̇אג̇עה ונסתבקי מן אבנא נסלא

פסקתא אבאהמא כ̇מרא פי תלך אללילה וג̇את אלכברי פצ̇אג̇עתה ולם יעלם בניאמהא וקיאמהא

פלמא כאן מן גד קאלת אלכברי ללצגרי הוד̇א צ̇אג̇עת אמס אבי פנסקיה כ̇מרא אללילה איצ̇א ותעאלי צ̇אג̇עיה ואסתבקי מנה נסלא איצ̇א

פסקתא פי תלך אללילה אבהאמא כ̇מרא וקאמת אלצגרי פצ̇אג̇עתה ולם יעלם בניאמהא ולא בקיאמהא

פחמלתא אבנתא לוט מן אביהמא

וולדת אלכברי אבנא ואסמתה מאב הו אבו אלמואביין אלי אליום

ואלצגרי איצ̇א ולדת אבנא ואסמתה בן עמי והו אבו בני עמאן אלי אליום