תפסיר רס"ג, בראשית יח

ותג̇לי לה אללה פי מרג̇ ממרא והו ג̇אלס פי באב אלכ̇בא ענד חמא אלנהאר

ורפע עיניה פנט̇ר פאד̇א בת̇לת̇ה נפר וקוף אמאמה פלמא ראהם חאצ̇ר תלקאהם מן באב אלכ̇בא וסג̇ד אלי אלארץ̇

וקאל ברגבה יא ולי אללה אן וג̇דת חט̇אא ענדך פלא תג̇ז ען עבדך

יקדם לכם קליל מן מא ואגסלו ארג̇לכם ואסתנדו תחת אלשג̇רה

ואקדם כסרה מן כ̇בז ואסנדו קלובכם בעד ד̇לך תמצ̇ון פאנכם עלי ד̇לך עברתם ען עבדכם קאלו כד̇לך אצנע כמא קלת

פסרע אברהים אלי אלכ̇בא אלי סארה פקאל אסרעי בת̇לת̇ אצוע מן דקיק אלסמיד אעג̇ניה ואצנעיה מלילא

ואלי אלבקר חאצ̇ר אברהים פאכ̇ד̇ עג̇לא מן אלבקר רכ̇צא וטיבא ודפעה אלי אלגלאם ואסתעג̇לה באצלאחה

ת̇ם אכ̇ד̇ סמנא ולבנא ואלעג̇ל אלד̇י אצלחה וג̇על בין אידיהם והו ואקף אמאמהם תחת אלשג̇ר פאכלו

ת̇ם קאלו לה אין סארה זוג̇תך קאל הוד̇א הי פי אלכ̇בא

קאל סארג̇ע אליך פי מת̇ל הד̇א אלוקת מן קאבל והוד̇א אבן לסארה זוג̇תך וסארה תסמע ענד באב אלכ̇בא והוא וראה

ואברהים וסארה שאכ̇א וטענא פי אלסן ואנתהי אן יכון לסארה סביל כאלנסא

פצ̇חכת סארה פי נפסהא קאילה בעד מא בלית יכון לי זי וסידי שיך̇

פקאל אללה לאברהים לם צ̇חכת סארה קאילה איקינא אלד וקד שכ̇ת

הל יכ̇פי ענד אללה שי סארג̇ע אליך פי מת̇ל הד̇א אלוקת מן קאבל ולסארה אבן

פג̇חדת סארה פי נפסהא קאילה לם אצ̇חך אד̇ כ̇אפת פקאל לא בל קד צ̇חכת

ת̇ם קאם אלקום מן ת̇ם ואשרפו קבאלה סדום ואברהים מעהם לישיעהם

פקאל אללה הל אכ̇פי אנא ען אברהים מא אנא צאנעה

ואברהים סיכון מנה אמה כבירה עט̇ימה ויתבארך בה ג̇מיע אמם אלארץ̇

ואנא אעלם באנה סיאמר בניה ואלה בעדה ויחפט̇ון טריק אללה ליעמלו באלעדל ואלחכם בסבב אן יופי אללה לאברהים במא ועדה

פקאל אללה צראך̇ סדום ועמורה קד כת̇ר וכ̇טיתהם קד עט̇מת ג̇דא

אורד אלאן אמרא מוג̇לא ואנט̇רו אכצראכ̇הם אלואצל אלי צנע ג̇מלתהם אם לא

ת̇ם ולי מן ת̇ם אלקום ומצ̇ו אלי סדום ואברהים עאדה ואקף בין ידי אללה

פתקדם אברהים וקאל איקינא תסיף אלצאלח מע אלטאלח

לעל יוג̇ד כ̇מסון צאלחא פי אלקריה איקינא תסיפהם ולא תצפח ענהם בסבב אלכ̇מסין צאלחא אלד̇ין פי מא בינהם

ואנת מעאד̇ מן אן תצנע מת̇ל הד̇א אלאמר אן תסיף אלצאלח מע אלטאלח פיכון אלצאלח כאלטאלח אנת מעאד̇ אחאכם ג̇מיע אלעאלם לא יעמל באלחכם

פקאל אללה אן וג̇דת פי סדם כ̇מסין צאלחא פי מא בינהם צפחת ען ג̇מיע אהל אלמוצ̇ע בסבבהם

פאג̇אבה אברהים פקאל הוד̇א קד אמענת פי אלכלאם בין ידי אללה ואנא תראב או רמאד

לעל ינקצון מן אלכ̇מסין צאלחא כ̇מסה אתהלך בסבב אלכ̇מסה ג̇מיע אלבלד קאל לא אהלכהם אן וג̇דת כ̇מסה וארבעין

ועאוד איצ̇א בכלמה פקאל לעל יוג̇ד ת̇ם ארבעון קאל לא אצנע שיא בסבב אלארבעין

קאל לא יצעב בין ידי אללה אן אתכלם לעל יוג̇ד ת̇ם ת̇לת̇ון קאל לא אצנע שיא אן וג̇דת ת̇ם ת̇לת̇ין

קאל הוד̇א קד אמענת פי אלכלאם בין ידי אללה לעל יוג̇ד ת̇ם עשרון קאל לא אהלכהם בסבב אלעשרין

קאל לא יצעב בין ידי אללה חתי אתכלם הד̇ה אלמרה פקט לעל יוג̇ד ת̇ם עשרה קאל לא אהלכהם בסבב אלעשרה

וארתפע נור אללה כמא פרג מן סכ̇אטבה אברהים ואברהים רג̇ע אלי מוצ̇עה