תפסיר רס"ג, בראשית יב

אד̇ קאל אללה אלי אברם אמץ̇ לך מן ארצ̇ך ומולדך ומן בית אביך אלי אלבלד אלד̇י אריך

ואצנע מנך אמה כבירה ואבארך פיך ואעט̇ם אסמך ותכון ברכה

ואבארך מבארכיך ושאתמך אלען ויתברך בך ג̇מיע עשאיר אלארץ̇

פמצ̇א אברם כמא אמרה אללה ומצ̇א מעה לוט וכאן אברם אבן כ̇מס וסבעין סנה חין כ̇רג̇ מן חראן

פאכ̇ד̇ אברם שרי זוג̇תה ולוט קריבה וג̇מיע סרחהם אלד̇י מלכוה ואלנפוס אלתי אכתסבו פי חראן וכ̇רג̇ו לימצ̇ו אלי בלד כנעאן וג̇או אליה

פטאף אברם פי אלבלד אלי מוצ̇ע נאבלוס ואלי מרג̇ ממרא ואלכנעאני חיניד̇ כאן מקימא פי אלבלד

ת̇ם תג̇לי לה אללה וקאל לנסלך אעטי הד̇א אלבלד ובנא ת̇ם מד̇בחא ללה אלמתג̇לי לה

ת̇ם אנתקל מן ת̇ם אלי אלג̇בל מן שרקי בית אל ומד ת̇ם כ̇באה בית אל מן אלגרב ואלעי מן אלשרק ובנא ת̇ם מד̇בחא ללה ודעא באסמה

ת̇ם רחל אברם כלמא מר רחל אלי אלקבלה

ת̇ם כאן ג̇וע פי אלבלד פאנחדר אברם אלי מצר ליסכן ת̇ם אד̇ אשתד אלג̇וע פי אלבלד

פלמא קרב מן אלדכ̇ול אלי מצר קאל לשרי זוג̇תה אנא אעלם אנך מראה ג̇מילה אלמנט̇ר

אכ̇אף אן ראוך אלמצריון וקאלו הד̇ה זוג̇תה קתלוני ואסתבקוך

קולי עני אנת אכ̇תי לכי יחסן אלי בסבבך באן תחיא נפסי בג̇רירתך

ולמא דכ̇ל אברם אלי מצר פראו אלמצריון אלמראה אנהא חסנה ג̇דא

וראוהא רוסא פרעון ומדחוהא אליה פאכ̇ד̇ת אלמראה אלי קצר פרעון

ואחסן לאברם בסבבהא פצאר לה גנם ובקר וחמיר ועביד ואמא ואתאן וג̇מאל

פתואעד אללה פרעון בבלאיא עט̇ימה ואלה בסבב שרי זוג̇ה אברם

פדעא פרעון באברם וקאל מה ד̇א צנעת בי ולם תכ̇ברני אנהא זוג̇תך

ולם קלת לי הי אכ̇תי חתי אתכ̇ד̇תהא לתכון לי זוג̇ה ואלאן הוד̇א זוג̇תך כ̇ד̇הא ואמץ̇

פוכל עליה פרעון ברג̇אל פבדרקו בה וזוג̇תה וג̇מיע מא לה