תפסיר רס"ג, בראשית יא

וכאן ג̇מיע אהל אלארץ̇ אהל לגה ואחדה וכלאם ואחד

ולמא רחלו מן אלמשרק וג̇דו בקיעא פי בלד אלשינור פאקאמו ת̇ם

וקאל בעצ̇הם לבעץ̇ תעאלו נלבן לבנא וננצ̇ג̇ה תבכ̇א פכאן להם אללבן כאלחג̇ארה ואלקפר כאן להם כאלמלאט

וקאלו תעאלו נבני לנא קריה ומג̇דלא ראסה ידאני אלסמא ונצנע לנא אסמא כילא נתבדד עלי וג̇ה ג̇מיע אלארץ̇

פאורד אללה אמרא מוג̇לא לירי אלקריה ואלמג̇דל אלד̇ין בנו בנו אדם

וקאל אללה הוד̇א הם שעב ואחד ולגה ואחדה לג̇מיעהם והד̇א מא אבתדו אן יפעלו ואלאן לא יפותהם ג̇מיע מא המו בה אן יצנעוה

תעאל אורד אמרא מוג̇לא אשתת בה לגתהם חתי לא יסמע כל אמר לגה צאחבה

פבדדהם אללה מן ת̇ם עלי וג̇ה ג̇מיע אלארץ̇ ואנתהו ען בנא אלקריה

ולד̇לך אסמהא באבל לאן ת̇ם שתת אללה לגה אהל אלארץ̇ ומן ת̇ם בדדהם אללה עלי ג̇מיע וג̇ההא

הד̇א שרח תאליד שם חין כאן אבן מאיה סנה אולד ארפכשד סנתין בעד אלטופאן

ועאש שם בעד ד̇לך כ̇מס מאיה סנה אולד פיהא בנין ובנאת

ולמא עאש ארפכשד כ̇מס ות̇לת̇ין סנה אולד שלח

ועאש בעד ד̇לך ארבע מאיה סנה ות̇לת̇ סנין אולד פיהא בנין ובנאת

ולמא עאש שלח ת̇לת̇ין סנה אולד עבר

ועאש בעד ד̇לך ארבע מאיה סנה ות̇לת̇ סנין אולד פיהא בנין ובנאת

ולמא עאש עבר ת̇לת̇ין וארבע סנין אולד פלג

ועאש בעד ד̇לך ארבע מאיה ות̇לת̇ין סנה אולד פיהא בנין ובנאת

ולמא עאש פלג ת̇לת̇ין סנה אולד רעו

ועאש בעד ד̇לך מאיתין סנה ותסע סנין אולד פיהא בנין ובנאת

ולמא עאש רעו את̇נתין ות̇לת̇ין סנה אולד שרוג

ועאש בעד ד̇לך מאיתין סנה וסבע סנין אולד פיהא בנין ובנאת

ולמא עאש שרוג ת̇לת̇ין סנה אולד נחור

ועאש בעד ד̇לך מאיתין סנה אולד פיהא בנין ובנאת

ולמא עאש נחור תסע ועשרין סנה אולד תרח

ועאש בעד ד̇לך מאיה סנה ותסע עשרה סנה אולד פיהא בנין ובנאת

ולמא עאש תרח סבעין סנה אולד אברם ונחור והרן

והד̇א שרח תאליד תרח תרח אולד אברם ונחור והרן והרן אולד לוט

ומאת הרן בחצ̇רה תרח אביה פי בלד מולדה פי אתון אלכסדניין

ואתכ̇ד̇ אברם ונחור להמא נסאא אסם זוג̇ה אברם שרי ואסם זוג̇ה נחור מלכה בנת הרן אבי מלכה ואבי יסכה

וכאנת שרי עאקרא ליס להא ולד

ואכ̇ד̇ תרח אברם אבנה ולוט אבן הרן אבן אבנה ושרי כנתה זוג̇ה אברם אבנה וכ̇רג̇ו מעהם מן אתון אלכסדאניין לימצ̇ו אלי בלד כנעאן פג̇או חראן פאקאמו ת̇ם

וכאן עמר תרח מאיתין סנה וכ̇מס סנין ומאת תרח פי חראן