תפסיר רס"ג, שמות מ

ת̇ם כלם אללה מוסי תכלימא

פי אלשהר אלאול פי אול יום מנה אנצב מסכן כ̇בא אלמחצ̇ר

וציר פיה צנדוק אלשהאדה ואסתר עליה אלסג̇ף

ת̇ם אדכ̇ל אלמאידה וצף צפיהא ת̇ם אדכ̇ל אלמנארה ואסרג̇ סרג̇הא

ת̇ם אג̇על מד̇בח אלד̇הב ללבכ̇ור בין ידי צנדוק אלשהאדה וציר אלסתר לבאב אלמסכן

ואג̇על מד̇בח אלקראבין בין ידי כ̇בא אלמחצ̇ר

ת̇ם אג̇על אלחוץ̇ בין כ̇בא אלמחצ̇ר ואלמד̇בח ואג̇על פיה מאא

ת̇ם אצ̇רב אלצראדק מסתדירא ועלק סתר באבה

ת̇ם כ̇ד̇ מן דהן אלמסח ואמסח אלמסכן וג̇מיע מא פיה וקדסה וג̇מיע אניתה פיציר קדסא

ואמסח איצ̇א מד̇בח אלצעיד̇ה וג̇מיע אניתה וקדסה פיציר מן כ̇ואץ אלאקדאס

ואמסח איצ̇א אלחוץ̇ ומקעדה וקדסהמא

וקדם הרון ובניה אלי באב כ̇בא אלמחצ̇ר ואגסלהם באלמא

ואלבס הרון ת̇יאב אלקדס ואמסחה וקדסה ליאם לי

וקדם בניה ואלבסהם תואניא

ואמסחהם כמא מסחת אבאהם ליאמו לי ויכון מסחהם ד̇אך להס אמאמה אלדהר לאג̇יאלהם

וצנע מוסי כג̇מיע מא אמרה אללה בה

פלמא כאן פי אלשהר אלאול מן אלסנה אלת̇אניה פי אליום אלאול מנה נצב אלמסכן

פאול מא נצבה מוסי וצ̇ע קואעדה ורכב עליהא תכ̇אתג̇ה ווצ̇ע פיה אמהאג̇ה ואוקף עמדה

ת̇ם בסט אלכ̇בא עליה וציר אלגשא עליה מן פוק כמא אמרה אללה

ת̇ם אכ̇ד̇ אלשהאדה פוצ̇עהא פי אלצנדוק וג̇על עליה אלדהוק וג̇על עליה אלגשא מן פוק

ת̇ם אדכ̇לה אלי אלמסכן ועלק אלסג̇ף אלמסתור פסתרה עליה כמא אמרה אללה

ת̇ם ג̇על אלמאידה פי כ̇בא אלמחצ̇ר פי ג̇אנב אלמסכן אלשמאלי כ̇ארג̇ אלסג̇ף

וצפף עליהא צפי כ̇בז בין ידי אללה כמא אמרה אללה

ת̇ם ציר אלמנארה פי כ̇בא אלמחצ̇ר חד̇א אלמאידה פי ג̇אנב אלמסכן אלג̇נובי

ואסרג̇ אלסרג̇ בין ידי אללה כמא אמרה אללה

ת̇ם ציר אלמד̇בח אלד̇הב פי כ̇בא אלמחצ̇ר בין ידי אלסג̇ף

ובכ̇ר עליה מן בכ̇ור אלצמוג כמא אמרה אללה

ת̇ם עלק סתר אלבאב עלי אלמסכן

וציר מד̇בח אלקראבין עלי באב כ̇בא אלמחצ̇ר וקרב עליה אלצעידה ואלהדיה כמא אמרה אללה

ת̇ם ציר אלחוץ̇ בין כ̇בא אלמחצ̇ר ואלמד̇בח וג̇על פיה מאא ללגסל

פיגסל מנה מוסי והרון ובנוה אידיהם וארג̇להם

פי דכ̇ולהם אלי כ̇בא אלמחצ̇ר ופי תקדמהם אלי אלמד̇בח יגסלוהא כמא אמרה אללה

ת̇ם צ̇רב אלצראדק חואלי אלמסכן ואלמד̇בח ועלק סתר באבה פאכמל מוסי ג̇מיע אלצנעה

ת̇ם גטא אלגמאם כ̇בא אלמחצ̇ר ונור אללה מלא אלמסכן

ולם יטק מוסי אן ידכ̇ל אלי כ̇בא אלמחצ̇ר ממא סכן עליה אלגמאם ונור אללה מלא אלמסכן

וכאן אלגמאם אד̇א ארתפע ען אלמסכן ירחל בנו אסראיל אלי ג̇מיע מראחלהם

ואן לם ירתפע לם ירחלו אלי יום ארתפאעה

לאן גמאמא מן ענד אללה עלי אלמסכן נהארא ונאר תכון פיה לילא בחצ̇רה בני אסראיל פי ג̇מיע מראחלהם