תפסיר רס"ג, שמות לט

ומן אלאסמנג̇ון ואלארג̇ואן ואלצבג קרמז צנעו ת̇יאב ושי ללכ̇דמה פי אלקדס וצנעו ת̇יאב אלקדס אלד̇י להרון כמא אמר אללה מוסי

וצנע אלצדרה מן ד̇הב ואסמנג̇ון וארג̇ואן וצבג קרמז ועשר משזור

וד̇לך באן ארקו צפאיח אלד̇הב ת̇ם קצ̇והא סלוכא וגזלוה מע אלאסמנגון ואלארג̇ואן וצבג אלקרמז ואלעשר צנעה חאד̇ק

וצנעו לה ג̇יבין מכ̇יטין כ̇אטוהמא פי טרפיה

ושפשג̇ אלד̇י עליה מת̇לה כצנעתה מן ד̇הב ואסמאנג̇ון וארג̇ואן וצבג קרמז ועשר משזור כמא אמר אללה מוסי

וצנעו חג̇רי אלבלור יחיט בהמא עיון אלד̇הב מנקוש עליהמא כנקש אלכ̇אתם אסמא בני אסראיל

וצירוהמא פי ג̇יבי אלצדרה חג̇רי ד̇כר לבני אסראיל כמא אמר אללה מוסי

וצנע אלבדנה צנעה חאד̇ק כצנעה אלצדרה מן ד̇הב ואסמאנג̇ון וארג̇ואן וצבג קרמז ועשר משזור

וכאנת אד̇ צנעוהא מרבעה מטויה שבר טולהא ושבר ערצ̇הא

ונט̇מו פיהא ארבעה סטור חג̇ארה ג̇והר אלסטר אלאול יאקות אחמר וזמרד ואצפר

ואלסטר אלת̇אני כחלי ומהא וברהמאן

ואלסטר אלת̇אלת̇ ג̇זע וסבג̇ ופירוזג̇

ואלסטר אלראבע אלאזרק ובלור ויסף ויחיט בהא עיון ד̇הב פי נט̇אמהא

ועלי אלחג̇ארה אסמא בני אסראיל לאנהא את̇נתא עשר באזא אסמאיהם כנקש אלכ̇אתם אסם כל ואחד כד̇אך עלי חג̇רה לאת̇ני עשר סבטא

וצנעו פי אלבדנה סלסלתין מעתדלתין צנעה אלצ̇פר מן ד̇הב כ̇אלץ

וצנעו עיון אלד̇הב פג̇עלו אלחלקתין פי טרפי אלבדנה

ועלקו אלצ̇פירתין אלד̇הב פי אלחלקתין פי טרפי אלבדנה

וטרפי אלצ̇פירתין אלאכ̇רתין עלקוהמא פי אלעיון אלת̇י ג̇עלוהא עלי ג̇יבי אלצדרה מן מקדמהא

וצנעו איצ̇א חלקתין מן ד̇הב פצירוהמא פי חאשיתהא אלתי אלי ג̇אנב אלצדרה מן דאכ̇ל

וצנעו איצ̇א חלקתין מן ד̇הב פג̇עלוהמא באזא ג̇יבי אלצדרה מן אספל מן מקדמהא אמאם תאליפהא פוק שפשג̇הא

וחבכו אלבדנה מן חלקהא אלי חלק אלצדרה בסלך אסמאנג̇ון לתכון פוק שפשג̇הא ולא יזול ענהא כמא אמר אללה מוסי

וצנע ממטר אלצדרה צנעה חאיך ג̇מלתה מן אסמאנג̇ון

וראסה פי וסטה כפם אלדרע וחאשיה תחיט בפיה לילא יתכ̇רק

וצנעו פי ד̇ילה רמאמין מן אסמאנג̇ון וארג̇ואן וצבג קרמז משזור

וצנעו ג̇לאג̇יל מן ד̇הב כ̇אלץ וג̇עלו אלג̇לאג̇יל פי מא בין אלרמאמין פי ד̇יל אלממטר מסתדירא

ג̇לג̇ל ורמאנה ג̇לג̇ל ורמאנה פי ד̇ילה מסתדירא ליכ̇דם כמא אמר אללה מוסי

וצנעו אלתואניא מן עשר צנעה חאיך להרון ולבניה

ואלעמאמה מן עשר ואלקלאנס אלפאכ̇רה מן עשר ואלסראויל מן עשר משזור

ואלזנאר מן עשר משזור ואסמאנג̇ון וארג̇ואן וצבג קרמז צנעה ראקם כמא אמר אללה מוסי

וצנעו עצאבה תאג̇ אלקדס מן ד̇הב כ̇אלץ וכתבו עליהא כתאבה כנקש אלכ̇אתם קדסא ללה

וג̇עלו עליה אלאסמאנג̇ון ליג̇על עלי אלעמאמה מן פוק כמא קאל אללה למוסי

פכמל ג̇מיע עמל אלמסכן כ̇בא אלמחצ̇ר ולמא צנע בנו אסראיל כג̇מיע מא אמר אללה מוסי

אתו באלמסכן אלי מוסי ואלכ̇בא וג̇מיע אניתה שט̇ט̇ה ותכ̇אתג̇ה ואמהאג̇ה ועמדה וקואעדה

ואלגטא אלג̇לוד אלכבאש אלאדים ואלגטא אלג̇לוד אלדארש ואלסג̇ף אלמסתור

וצנדוק אלשהאדה ודהוקה וגשאה

ואלמאידה וג̇מיע אניתהא ואלכ̇בז אלמוג̇ה

ואלמנארה אלכ̇אלצ̇ה וסרג̇הא סרג̇ אלנצ̇וד וג̇מיע אניתהא ודהן אלאצ̇אה

ואלמד̇בח אלד̇הב ודהן אלמסח ובכ̇ור אלצמוג וסתר באב אלכ̇בא

ואלמד̇בח אלנחאס ואלסרד אלנחאס אלד̇י לה ודהוקה וג̇מיע אניתה ואלחוץ̇ ומקעדה

וקלוע אלצראדק ועמדה וקואעדה וסתר באבה ואטנאבה ואותאדה וסאיר אניה עמל אלמסכן לכ̇בא אלמחצ̇ר

ות̇יאב אלושי ללכ̇דמה פי אלקדס ות̇יאב אלקדס להרון אלאמאם ות̇יאב בניה ללאמאמה

כג̇מיע מא אמר אללה בה מוסי כד̇אך צנעו בנו אסראיל ג̇מיע אלעמל

פלמא ראי מוסי ג̇מיע אלצנעה פאד̇א בהם צנעוהא כמא אמר אללה בארך עליהם מוסי