תפסיר רס"ג, דברים ו

והד̇ה אלוצאיא ואלרסום ואלאחכאם אלתי אמרני אללה רבכם אן אעלמכמוהא תצנעוהא פי אלבלד אלדיי אנתם צאירון אליה לתחוזוה

לכי תכ̇אף אללה רבך ותחפט̇ ג̇מיע רסומה ווצאיאה אלתי אנא אמרך בהא אנת ואבנך ואבן אבנך טול איאם חיאתך ולכי תטול מדתך

פאסמע ד̇לך יא אסראיל ואחפט̇ה ואעמל בה לכי יכ̇אר לך ולכי תכת̇ר ג̇דא כמא ועדך אללה אלאה אבאיך פי בלד יפיץ̇ לבנא ועסלא

אעלם אלאסראיל אן אללה רבנא אללה אלואחד

ואחבב אללה רבך מכ̇לצא בכל קלבך ונפסך וג̇דך

ולתכן הד̇ה אלכלמאת אלתי אנא אמרך בהא אליום פי נפסך

ואחכהא לבניך ואדרסהא פי חאל ג̇לוסך פי מנזלך ומסירך פי טריקך וענד ניאמך וקיאמך

ואעקדהא עלאמה עלי ידיך ותכון מנשורה בין עיניך

ואכתבהא עלי כ̇דוד פתוח מנזלך ואבואבך

ויכון אד̇א אדכ̇לך אללה רבך אלי אלבלד אלד̇י קסם לאבאיך לאברהים ואסחק ויעקוב אן יעטיכה תלך קרי עט̇ימה ג̇יאד לם תבנהא

וביות ממלוה כל כ̇יר לם תמלאהא וצהאריג̇ מנקורה לם תנקרהא וכרום וזיאתין לם תגרסהא פאכלת ושבעת

פאחד̇ר לך אן תנסא אללה רבך אלד̇י אכ̇רג̇ך מן בלד מצר מן בית אלעבודיה

בל כ̇ף אללה רבך ואעבדה ואחלף באסמה בארא

לא תתבע מעבודאת אכ̇ר מן מעבודאת אלאמם אלד̇ין חואליכם

לאן אללה רבך טאיק מעאקב פי מא בינכם לילא ישתד גצ̇בה עליף פינפד̇ך ען וג̇ה אלארץ̇

ולא תג̇רבו אללה רבכם כמא ג̇רבתמוה פי ד̇את אלמחנה

בל אחפט̇ו חפט̇א וצאיא אללה רבכם ושואהדה ורסומה אלתי אמרך בהא

ואצנע אלמסתקים ואלכ̇יר בין ידיה לכי יכ̇אר לך פתדכ̇ל ותחוז אלבלד אלג̇יד אלד̇י קסם אללה לאבאיך

וידפע אללה ג̇מיע אעדאיך בין ידיך כמא ועדך

ואן סאלך אבנך גדא קאילא מא סבב אלשואהד ואלרסום ואלאחכאם אלתי אמרכם אללה רבנא בהא

פקל לה אנא כנא עבידא לפרעון במצר פאכ̇רג̇נא אללה מנהא ביד שדידה

ואחל איאת ובראהין עט̇ימה צ̇ארה במצר פי פרעון וג̇מיע אלה בחצ̇רתנא

ואכ̇רג̇נא מן ת̇ם לכי ידכ̇לנא ויעטינא אלבלד אלד̇י קסם עליה לאבאינא

פאמרנא אללה באן נצנע הד̇ה אלרסום ונכ̇אף אללה רבנא לכי יכ̇אר לנא טול אלזמאן ונחיא כיומנא הד̇א

וחסנאת תכון לנא אד̇א חפט̇נא ועמלנא ג̇מיע הד̇ה אלשריעה בין ידי אללה רבנא כמא אמרנא