תפסיר רס"ג, דברים ה

ת̇ם דעא מוסי בג̇מיע אלאסראיל פקאל להם אסמעו אלרסום ואלאחכאם אלתי אנא אמרכם אליום פתעלמוהא ואחפט̇והא ואעמלו בהא

אן אללה רבנא עהד מענא עהדא פי חרב

וליס מע אבאינא פקט עהד אללה ד̇לך אלעהד אלא מענא איצ̇א ונחן ההנא אליום כלנא אחיא

וד̇לך אן שאפהא כלמכם אללה פי חרב מן וסט אלנאר

ואנא קאים בין נור אללה ובניכם פי ד̇לך אלוקת אכ̇ברכם בכלאמה לאנכם כ̇פתם אלנאר ולם תצעדו אלג̇בל פקאל לכם

אנא אללה רבך אלד̇י אכ̇רג̇תך מן בלד מצר מן בית אלעבודיה

לא יכון לך אלאה אכ̇ר מן דוני

ולא תצנע לך פסלא ולא כל שבה ממא פי אלסמא אלתי פוקך וממא פי אלארץ̇ אלתי תחתך וממא פי אלמא אלד̇י תחת אלארץ̇

לא תסג̇ד להא ולא תעבדהא לאני אללה רבך אלטאיק אלמעאקב מטאלב בדינוב אלאבא מע אלבנין ואלת̇ואלת̇ ואלרבאוע מן שאניי

מג̇אזי באלאחסאן אלופא מן מחביי וחאפט̇י וצאיאי

לא תחלף באסם אללה רבך זורא לאן אללה לא יברי מן יחלף באסמה זורא

ואחפט̇ יום אלסבת וקדסה כמא אמרך אללה רבך

סתה איאם תעמל ותצנע ג̇מיע צנאיעך

ואליום אלסאבע סבת ללה רבך לא תעמל שיא מן אלצנאיע אנת ואבנך ואבנתך ועבדך ואמתך ות̇ורך וחמארך וסאיר בהאימך וצ̇יפך אלד̇י פי מחאלך לכי יסתריח עבדך ואמתך מת̇לך

ואד̇כר אנך כנת עבדא פי בלד מצר פאכ̇רג̇ך אללה רבך מן ת̇ם ביד שדידה וד̇ראע ממדודה ולד̇לך אמרך באן תקים פי יום אלסבת

אכרם אבאך ואמך כמא אמרך אללה רבך לכי תטול איאמך ויכ̇אר לך פי אלבלד אלד̇י אללה רבך מעטיך

לא תקתל אלנפס ולא תזן ולא תסרק ולא תשהד עלי צאחבך שהאדה זור

ולא תתמן זוג̇ה צאחבך ולא תשתה מנזלה וצ̇יעתה ועבדה ואמתה ות̇ורה וחמארה וסאיר מא לה

הד̇ה אלכלמאת כלם אללה בהא ג̇מיע ג̇וקכם פי אלג̇בל מן לדן אלנאר ואלגמאם ואלצ̇באב בצות עט̇ים גיר מעאוד וכתבהא עלי לוחי אלג̇והר ודפעהמא אלי

פלמא סמעתם אלצות מן לדן ט̇לאם אלג̇ם ואלג̇בל משתעל באלנאר תקדם אלי ריסא אסבאטכם ומשאיכ̇כם

פקלתם הוד̇א קד אוראנא אללה רבנא כרמה ועט̇מתה וסמענא צותה מן דאכ̇ל אלנאר ועלמנא אליום אנה יג̇וז אן יכלם אללה אנסאנא פיחיא

ואלאן פלא נהלך ולא תאכלנא הד̇ה אלנאר אלעט̇ימה פאנא אן עאודנא אסתמאע כלאם אללה רבנא איצ̇א מתנא

לאנה אי בשרי סמע צות אללה אלחי מכ̇אטבה מן אלנאר מת̇לנא פעאש

תקדם אנת ואסמע ג̇מיע מא יקולה אללא רבנא ואנת תכלמנא בג̇מיע מא יכלמך בה אללה רבנא ונסמע ונעמל בה

פסמע אללה כלאמכם אד̇ כלמתמוני וקאל לי קד סמעת כלאם האולי אלקום אד̇ כלמוך וקד אחסנו פי ג̇מיע מא קאלו

פליתמנו אן יבקא להם הד̇א אלקלב אן יכ̇אפוני ויחפט̇ וצאיאי טול אלזמאן לכי יכ̇אר להם ולבניהם אלי אלדהר

אמץ̇ פקל להם ארג̇עו אלי אכ̇ביתכם

ואנת פקם ההנא בין ידי חתי אכלמך בג̇מיע אלוצאיא ואלשראיע ואלאחכאם אלתי תעלמהם יצנעונהא פי אלבלד אלד̇י אנא מעטיהם יחזונה

פאחפט̇ו ואעמלו כמא אמרכם אללה רבכם ולא תזולו ימנה ולא יסרה

בל פי ג̇מיע אלטריק אלתי אמרכם אללה רבכם תסירון לכי תחיו ויכ̇אר לכם ותטול מדתכם פי אלבלד אלד̇י תחוזונה