תפסיר רס"ג, דברים ג

ת̇ם ולינא פצעדנא טריק אלבת̇ניה פכ̇רג̇ עוג מלך אלבת̇ניה תלקאנא הו וג̇מיע קומה ללחרב אלי אד̇רעאת

פקאל אללה לי לא תכ̇פה פאני קד אסלמתה פי ידך וג̇מיע קומה ובלדה פאצנע בה כמא צנעת בסיחון מלך אלאמורי אלמקים בחשבון

פאסלם אללה רבנא פי ידנא איצ̇א עוג מלך אלבת̇ניה וקומה פקתלנאהם חתי לם נבק מנהם שרידא

ופתחנא ג̇מיע קראה פי ד̇לך אלוקת ולם תבק קריה לם נאכ̇ד̇הא מנהם מן ד̇לך סתין קריה עלי כ̇ט אלמוג̇ב ממלכה עוג פי אלבת̇ניה

כל הד̇ה קרי חצינה בסור שאמך̇ ומצארע ונג̇ור סוי קרי אלרבץ̇ פאנהא כת̇ירה ג̇דא

וכמא צנענא בסיחון מלך חשבון כד̇אך אתלפנא מן כל קריה אלרהט ואלנסא ואלאטפאל

וכל בהימה וסלב אלקרי גנמנאהא

פחצל לנא פי ד̇לך אלוקת בלד מלכי אלאמוריין אללד̇ין פי חד̇א ג̇אנב אלארדן מן ואדי ארנון אלי ג̇בל חרמון

אלד̇י יסמונה אלצידאניון שריון ואלאמוריון שניר

וג̇מיע קרי אלסהל ואלג̇רש ואלבת̇ניה אלי סלכה ואד̇רעאת הי איצ̇א ממלכה עוג פי אלבתניה

לאנה בקי מן באקיה אלג̇באברה הוד̇א לה סריד מן חדיד פי אלראביה אלתי לבני עמאן טולה תסעה ד̇רע וערצ̇ה ארבעה ד̇רע בד̇ראע אלמלך

והד̇א אלבלד אלד̇י חזנאה פי ד̇לך אלוקת פמן ערער אלתי עלי ואדי ארנון ונצף ג̇בל אלג̇רש וקראה דפעת ד̇לך אלי אלראובניין ואלגדיין

ובאקי ג̇רש וג̇מיע אלבת̇ניה ממלכה עוג דפעתה אלי נצף סבט אלמנשה וג̇מיע כ̇ט אלמוג̇ב ואלבת̇ניה יסמיאן בלד אלשג̇עא

ויאיר אבן מנשה אכ̇ד̇ ג̇מיע אלמוג̇ב אלי חד אלג̇שוריין ואלמעכתיין פסמאהא באסמה סואד יאיר אלי יומנא הד̇א

ולמכיר דפעת אלג̇רש

ודפעת אלי אלראובניין ואלגדיין מן אלג̇רש אלי ואדי ארנון ווסט אלואדי וחדה אלי ואדי יבק תכ̇ם בני עמאן

ואלגור ואלארדן וחדה מן ג̇ינסר אלי בחר אלגור ואלבחירה אלמיתה ומצב אלקלעה שרקיא

פאמרת האולי מנכם פי ד̇לך אלוקת קאילא אד̇ אללה רבכם קד אעטאכם הד̇א אלבלד פחזתמוה פאעברו מג̇רדין בין ידי אכ̇ותכם בני אסראיל כל ד̇וי חיל

עדא נסאכם ואטפאלכם ומאשיתכם פאני עאלם אן לכם מאשיה כת̇ירה פליקימו פי קראכם אלתי אעטיתכם

אלי אן יקר אללה אכ̇ותכם מת̇לכם פיחוזו הם איצ̇א אלבלד אלד̇י אללה רבכם מעטיהם פי ד̇אך ג̇אנב אלארדן פתרג̇עו כל אמר אלי חוזה אלד̇י אעטיתכם

ואמרת יהושע פי ד̇לך אלוקת וקלת לה עינאך קד ראת ג̇מיע מא צנע אללה בהד̇ין אלמלכין כד̇אך יצנע אללה בג̇מיע אלממאלך אלתי אנת ג̇איז אליהא

פלא תכ̇אפוהם אן אללה רבכם מחארב ענכם

ת̇ם תחננת בין ידי אללה פי ד̇לך אלוקת קאילא

אללהם יא רב אנת אבתדית אן תרי עבדך עט̇מתך וקדרתך אלשדידה לאן אי אלאה פי אלסמא ופי אלארץ̇ יצנע כצנאיעך וג̇בארותך

אסאלך אן אג̇וז ואנט̇ר אלי ד̇לך אלבלד אלד̇י פי ד̇אך ג̇אנב אלארדן וד̇לך אלג̇בל אלג̇יד ואללבנאן

פוג̇ד אללה עלי בסבבכם ולם יסמע לי בל קאל לי חסבך ולא תזד פי מסאלתי פי הד̇א אלבאב

לכן אצעד אלי ראס אלקלעה וארפע עיניך אלי אלגרב ואלשמאל ואלג̇נוב ואלשרק ואנט̇רהא בעיניך פאנך לא תג̇וז הד̇א אלארדן

ומר יהושע ושדדה ואידה פאנה יעבר בין ידי האולי אלקום וינחלהם אלבלד אלד̇י תראה

ת̇ם ג̇לסנא פי אלואדי ממא ילי בית פעור