תפסיר רס"ג, דברים ב

ת̇ם ולינא ורחלנא פי אלבר אלי טריק בחר אלקלזם כמא אמרני אללה ואסתדרנא ג̇בל שעיר מדה טוילה

ת̇ם כלמני אללה תכלימא

חסבכם מן אלאחאטה בהד̇א אלג̇בל ולו ענה שמאלא

ומר לקומך וקל להם אנכם ג̇איזון פי תכ̇ם אכ̇ותכם בני עשו אלמקימין בשעיר פסיכ̇אפונכם פאחד̇רו ג̇דא

לא תתחרשו בהם פאני ליס מעטיכם מן בלדהם ולא וטי קדם לאן וראת̇ה לעשו אעטית ג̇בל שעיר

בל אשתרו מנהם טעאמא בת̇מן פכלוה ומאא פאשרבוה

לאן אללה רבך קד בארך לך פי ג̇מיע אעמאלך ואחסן עליך ענד מסירך פי אלבר אלעט̇ים פהד̇ה ארבעון סנה אללה רבך מעך לם יעוזך שיא

פג̇זנא אכ̇ותנא בני עשו אלמקימין בשעיר מן טריק אלבידא ואילת ועציון גבר וולינא ורחלנא טריק בריה מואב

פקאל אללה לי לא תחאצר אלמואביין ולא תתחרש בהם פאני לא אעטיכם מן בלדהם חוזא אן לבני לוט ג̇עלת עאר וראת̇ה

וכאן אלמהיבון אקאם בהם קבלהם קום כביר ורפיע וכת̇יר כאלג̇בארין

והם יחסבון אלשג̇עא כאלג̇ברין ואלמואביון יסמונהם מהיבין

ואמא פי שעיר פאקאם אלחוריון קבל בני עשו חתי אתו פקרצ̇והם ואנפד̇והם מן בין אידיהם ואקאמו פי מכאנהם כמא צנע אלאסראיל בבעץ̇ חוזה אלד̇י אעטאהם אללה

אלאן קומו אעברו ואדי זרד פעברנאה

וכאנת ג̇מלה אלאיאם מנד̇ סרנא מן רקים ברנע אלי אן עברנא ואדי זרד ת̇מאניה ות̇לת̇ין סנה אלי אן פני ג̇מיע אלקום אלמחארבין מן אלעסכר כמא קסם אללה עליהם

וואפה מן ענד אללה חלת בהם לאהאמתהם אלי אן פנו

פלמא פני ג̇מיעהם מן בין אלאמה

קאל אללה לי תכלימא

אנת ג̇איז אליום תכ̇ם מואב אלד̇י הו עאר

פתקרב מן בני עמון פלא תחאצרהם ולא תתחרש בהם פאני לא אעטיך מן בלדהם חוזא אד̇ ג̇עלתהא לבני לוט חוזא

והי תחסב איצ̇א מן בלד אלג̇בארין לאן אלג̇באברה אקאמו בהא קבלהם ואלעמאניון יסמונהם ד̇וי אלהמם

קום כביר ורפיע כאלג̇בארין אנפד̇הם אללה מן בין אידיהם פקרצ̇והם וג̇לסו מכאנהם

כמא צנע לבני עשו אלמקימין בשעיר אד̇ אנפד̇ אלחוריין מן בין ידיהם פקרצ̇והם ואקאמו מכאנהם אלי הד̇א אליום

ואלעוין אלמקימון ברפח אלי גזה ואלדמיאטיון אלד̇ין כ̇רג̇ו מן דמיאט קרצ̇והם ואקאמו מכאנהם

פקומו ארחלו ואעברו ואדי ארנון אנט̇ר קד אסלמת פי ידך סיחון מלך חשבון אלאמורי ובלדה פאבדי בקרצ̇ה ותחרש במחארבתה

ומן הד̇א אליום אבתדי באיקאע פזעך וכ̇ופך פי קלוב אלאמם אלד̇ין תחת ג̇מיע אלסמא פאד̇א הם סמעו בכ̇ברך רג̇זו וארתעדו מן בין ידיך

פבעת̇ת ברסל מן בריה קדמות אלי סיחון מלך חשבון באלסלאם ואלכלאם

אעבר פי בלדך פי אלטריק אלג̇אדה אסיר ולא אמיל ימנה ולא יסרה

טעאמא תמירני בת̇מן פאכלה ומאא תביעני בת̇מן פאשרבה ואעבר ברג̇לי פקט

כמא צנע בי בעץ̇ ד̇לך בנו עשו אלמקימון בשעיר ואלמואביון אלמקימון בעאר אלי אן אעבר אלארדן אלי אלבלד אלד̇י אללה רבנא מעטינאה

פלם ישא סיחון מלך חשבון אג̇אזתנא פי בלדה לאן אללה רבך צעב רוחה ואיד קלבה לכי יסלמה פי ידך כמא תרי אליום

פקאל אללה לי אנט̇ר קד בדית אן אסלם סיחון ובלדה פי ידך פאבד בקרצ̇ה וחז בלדה

פכ̇רג̇ סיחון תלקאנא הו וג̇מיע קומה ללחרב אלי יהץ

פאסלמה אללה רבנא פי אידינא פקתלנאה ובניה וסאיר קומה

פפתחנא ג̇מיע קראה פי ד̇לך אלוקת ואתלפנא מן כל קריה אלרהט ואלנסא ואלאטפאל לם נבק שרידא

וגנמנא כל בהימה וסלב אלקרי אלתי פתחנא

מן ערער אלד̇י עלי שאטי ואדי ארנון ואלקריה אלתי פי אלואדי ואלי ג̇רש לם תבק קריה מנעת מנא בל אלכל אסלמה אללה רבנא בין ידינא

עדא בלד בני עמון פאנך לם תקרבה פג̇מיע שאטי ואדי יבק וקרי אלג̇בל וסאיר מא נהאנא ענה אללה רבנא