תפסיר רס"ג, דברים כה

ואד̇א וקעת כ̇צומה בין אנאס פליתקדמו אלי ד̇וי אלחכם יחכמו בינהם וליזכו אלזכי ויט̇למו אלט̇אלם

ואד̇א אסתחק אלט̇אלם צ̇רבא פליבטחה אלחאכם ויצ̇רבה בחצ̇רתה במקדאר כ̇טיתה באחצא

יג̇לדה ארבעין לא יזד עליהא שיא פאן זאד עלי ד̇לך צארת ג̇לדה עט̇ימה וליהן ד̇לך אכ̇אך בחצ̇רתך

לא תכ̇טם אלת̇ור פי דוסה

ואד̇א אקאם אכ̇ואן ג̇מיעא ת̇ם מאת אחדהמא וליס לה ולד פלא תכן זוג̇ה אלמית לרג̇ל גריב ען אלאכ̇וה בל סלפהא ידכ̇ל אליהא באן יתכ̇ד̇הא לה זוג̇ה ויבתני בהא

וליכן אלבכר אלד̇י ירג̇ו אן תלד מנה יקום עלי אסם אכ̇יה אלמית לילא ינדרס אסמה מן אלאסראיל

פאן לם ישא אלרג̇ל אן יתזוג̇ סלפתה פלתצעד אלי באב אלחאכם אלי אלשיוך̇ ותקול קד אבא סלפי אן יקים לאכ̇יה אסמא פי מא בין בני אסראיל ולם ישא אן יבני בי

פידעו בה שיוך̇ קריתה ויכלמוה פי ד̇לך פאד̇א וקף עלי אלקול וקאל אנא לא אריד אלתזויג̇ בהא

תקדמת סלפתה אליה בחצ̇רה אלשיוך̇ וכ̇לעת נעלה מן רג̇לה ובצקת בחצ̇רתה ואג̇אבתה וקאלת כד̇א יצנע ברג̇ל לא יבני בית אכ̇יה

וליסמי אסמה פי אלאסראיל בית מכ̇לוע אלנעל

ואד̇א תכ̇אצמא רג̇לאן ג̇מיעא פגלב אחדהמא אכ̇אה פתקדמת זוג̇ה אחדהמא לתכ̇לצה מן ידה פמדת ידהא פאמסכת פי חיאה

פאקטע כפהא ולא תשפק עליהא

לא יכן פי כיסך צנג̇תאן כברי וצגרי

לא יכן לך פי ביתך מכיאלאן כביר וצגיר

בל צנג̇את ואפיאת עאדלאת תכון לך ואכיאל ואפיה עאדלה תכון לך לכי תטול איאמך פי אלבלד אלד̇י אללה רבך מעטיך

לאן אללה יכרה כל פאעל האולי כל צאנע אלג̇ור

אד̇כר מא צנע בך עמלק פי אלטריק פי כ̇רוג̇כם מן מצר

אנה ואפאך פי אלטריק פתטרף מנך ג̇מיע אלמזחפין וראך ואנת לאגב ותעב ולם יכ̇ף אללה

פאד̇א אראחך אללה רבך מן ג̇מיע אעדאיך אלתי חואליך פי אלבלד אלד̇י אללה רבך מעטיך נחלה לתחוזה פאמח ד̇כר עמלק מן תחת אלסמא ולא תנס ד̇לך