תפסיר רס"ג, דברים כד

ואד̇א תזוג̇ רג̇ל מראה ומלכהא ת̇ם אנהא לם תג̇ד חט̇אא ענדה או וג̇ד עליהא אמרא קביחא פליכתב להא כתאב קטעה וידפעהא אליהא ויטלקהא מנה

פאן כ̇רג̇ת מן מנזלה ומצ̇ת וצארת לרג̇ל אכ̇ר

פשנאהא אלרג̇ל אלאכ̇ר וכתב להא כתאב קטעה פדפעה אליהא וטלקהא מנה או מאת אלרג̇ל אלאכ̇ר אלד̇י אתכ̇ד̇הא לה זוג̇ה

פלא יחל לבעלהא אלאול אלד̇י אטלקהא ליעוד ויתזוג̇ בהא לתכון לה זוג̇ה בעד מא מלכהא ג̇רה פאנהא כריהה בין ידי אללה פלא תוקע כ̇טאא עלי בלדך אלד̇י אללה רבך מעטיך נחלה

ואד̇א תזוג̇ רג̇ל מראה ג̇דידה פלא יכ̇רג̇ פי אלג̇יש ולא ימר עליה שי מן אלאמור בל יכון פארגא לביתה סנה ואחדה ויפרח זוג̇תה אלתי אתכ̇ד̇הא

לא יסתרהן אחד אלרחא אלספלא ואלעליא פאנה יסתרהן קות אלנפוס

ואן וג̇ד אנסאן קד סרק נפסא מן אכ̇ותה מן בני אסראיל פאסתרקהא או באעהא פליקתל ד̇לך אלסארק ואנף אהל אלשר מן בינך

ואחתרס מן בלוי אלברץ ואחפט̇ רסמה ג̇דא ואעמל פיה כמא יפתיכם אלאימה אלליואניון כמא אמרתהם

ואד̇כר מא צנע אללה רבך במרים פי אלטריק פי כ̇רוג̇כם מן מצר

ואד̇א אנסאת צאחבך נסיה פלא תדכ̇ל אלי ביתה פתאכ̇ד̇ עוצ̇הא

בל תקף כ̇ארג̇א ואלרג̇ל אלד̇י אנסאתה הו יכ̇רג̇ אליך אלעוץ̇ אלי כ̇ארג̇

ואן כאן רג̇לא צ̇עיפא פלא תבת ועוצ̇ה ענדך

בל רדה אליה רדא ענד מגיב אלשמס אד̇ ינאם פיה פידעו לך ותכון לך חסנה בין ידי אללה רבך

ולא תגשם אג̇ירא וכ̇אצה צ̇עיף או מסכין מן אכ̇ותך או מן צ̇יפך אלד̇י פי בלדך פי מחאלך

בל אדפע לה אג̇רתה פי יומה מן קבל מגיב אלשמס אד̇ הו צ̇עיף ועליהא קד כ̇אטר בנפסה ולא ידעו עליך אלי אללה פתחל בך עקובה

לא יקתל אלאבא ען אלבנין ולא אלבנון ען אלאבא בל יקתל כל אמר בכ̇טיתה

לא תמל חכם גריב או יתים ולא תסתרהן ת̇וב ארמלה

ואד̇כר אנך כנת עבדא במצר ופכך אללה רבך ולד̇לך אנא אמרך אן תצנע הד̇ה אלאמור

ואד̇א חצדת חצאדך פי צ̇יעתך פנסית כפה פי אלצחרא פלא תרג̇ע פתאכ̇ד̇הא בל תכון ללגריב ואליתים ואלארמלה לכי יבארכך אללה רבך פי ג̇מיע עמל ידיך

ואד̇א נפצ̇ת זיתונך פלא תסתקץ בעד ד̇לך בל יכון ללגריב ואליתים ואלארמלה

ואד̇א קטפת כרמך פלא תמשה בעד ד̇לך בל יכון ללגריב ולליתים ואלארמלה

ואד̇כר אנך כנת עבדא במצר ולד̇לך אנא אמרך באן תצנע הד̇ה אלאמור