תרגום ניאופיטי א

מלקדמין בחכמה [בחוכמתא] ברא (ד)יי שכלל [ושכלל] ית שמיא וית ארעא:

וארעא הוות תהיא ובהיא וצדי [וצדיה] מן בר נש ומן בעיר וריקנא מן כל פלחן צמחין ומן אילנין וחשוכא פריס על אפי תהומא ורוח דרחמין מן קדם יי הוה מנשבא על אפי מיא:

ואמר ממ(רא) [נ"א ממרה] דיי יהוי נהור והות נהור כגזירת ממריה׃

וגלי קדם יי ית נהורא ארום טב הוא ואפשר ממרא דיי בין נהורא לבין חשוכא׃

וקרא ממרא דיי לנהורא איממ׳ ולחשוכא קרא לליא והוא רמש והוה צפר סדר עבד בראשית יום קדמאיי׃

ואמר ממרא דיי יהוי רקיעא במציעות מיא ויהוי מפרש בין מיא ארעא לבין מיא עיליא׃

וברא יי ית רקיעא ואפרש בין מיא די מן תחות רקיעא ובין מיא די מלעיל לרקיעא [לרקיע שמיא] והוה כן כמימריה׃

וקרא ממרא דיי לרקיעא שמיא והוה רמש והוה צפר סדר עבד בראשית יום תניין׃