תפסיר רס"ג, במדבר לה

ת̇ם כלם אללה מוסי פי בידאת מואב עלי ארדן יריחא קאילא

מר בני אסראיל באן יעטו ללליואניין מן נחלה חוזהם קרי יסכנונהא ואפניה להא חואליהא תעטוהם

פתכון אלקרי סכני להם ואפניתהא תכון לבהאימהם וסרחהם וסאיר חיואנהם

ואפניה אלקרי אלתי תעטונהא אליואניין מן כ̇ארג̇ חאיט אלקריה אלף ד̇ראע מסתדירא

ת̇ס אמסחו מן כ̇ארג̇ אלקריה אלי ג̇הה אלמשרק אלפי ד̇ראע ואלי ג̇הה אלג̇נוב אלפי ד̇ראע ואלי ג̇הה אלמגרב אלפי ד̇ראע ואלי ג̇הה אלשמאל אלפי ד̇ראע ואלקריה פי וסטהא פד̇לך יכון להם מקדאר אפניה אלקרי

ואלקרי אלתי תעטונהא אליואניין מנהא סת קרי אלחמי אלתי תעזלונהא ליהרב אליהא אלקאתל ואצ̇יפו אליהא את̇נתין וארבעין קריה

פיציר ג̇מיע אלקרי אלתי תעטונהם ת̇מאן וארבעין קריה ואפניתהא

פהד̇ה אלקרי אלתי תעטונהם מן חוז בני אסראיל פממן אכ̇ד̇ כת̇ירא כת̇רו וממן אכ̇ד̇ קלילא קללו וליעט כל סבט עלי קדר נחלתה

ת̇ם כלם אללה מוסי תכלימא

מר בני אסראיל וקל להם אד̇א אנתם ג̇זתם אלארדן אלי בלד כנעאן

תסמו לכם ד̇לך קרי חמי יהרב אליהא אי קאתל קתל נפסא סהוא

פתכון תלך אלקרי תחמיה מן אלולי ולא יקתל חתי יקום בין ידי אלג̇מאעה פיחכמון עליה בד̇לך

ואלקרי אלתי תעזלונהא סת קרי חמי תכון לכם

ות̇לאת̇ מנהא מן עבר אלארדן ות̇לאת̇ מנהא פי בלד כנעאן תכון קרי חמי

לבני אסראיל ואלגריב ואלדכ̇יל פימא בינכם ליהרב אליהא כל מן קתל נפסא סהוא

ואן כאן צ̇רבה באניה חדיד פקתלה פהו קאתל יסתחק אלקתל

ואן צ̇רבה בחג̇ר מקבוץ̇ במקדאר מא ימות בה פקתלה פהו קאתל יסתחק אלקתל

או צ̇רבה באניה כ̇שב מקבוץ̇ במקדאר מא ימות בה פקתלה פהו קאתל יסתחק אלקתל

וולי אלדם יקתלה אד̇א צאדפה בחק

ואן דפעה בשנאה או טרח עליה שיא בתעמד פקתלה

או צ̇רבה בידה בעדוה פקתלה פהו קאתל יסתחק אלקתל וולי אלדם יקתלה אד̇א פאג̇אה בחק

ואן דפעה בגתה בלא בגצ̇ה או טרח עליה אניה בלא תעמד

או אוקע עליה אי חג̇ר כאן בלא עלם פמאת והו פי ד̇לך ליס בעדו לה ולא טאלב שרה

פלתחכם אלג̇מאעה בין אלקאתל ובין אלולי בהד̇ה אלאחכאם

ותכ̇לץ הד̇א אלקאתל מן יד אלולי ותרדה אלי קריה חמאה אלתי הרב אליהא ויקים בהא אלי מות אלאמאם אלכביר אלד̇י מסח בדהן אלקדס

ואן הו כ̇ארג̇ ען חד קריה חמאה אלתי הרב אליהא

פאצאבה ולי אלדם כ̇ארג̇ ען חד קריה חמאה פקתלה פלא ת̇אר לה

בל יג̇לס פי קריה חמאה אלי מות אלאמאם אלכביר ובעד ד̇לך ירג̇ע אלי ארץ̇ חוזה

פלתכן הד̇ה לכם רסום חכם עלי מר אג̇יאלכם פי ג̇מיע מסאכנכם

כל מן קתל נפסא עאמדא פבקול שאהדין אקתלוה ואמא שאהד ואחד פלא ישהד עליה פיקתל

ולא תאכ̇ד̇ו דיה ען נפס קאתל יג̇ב עליה אלקתל בל יקתל קתלא

ולא תאכ̇ד̇ו מנה איצ̇א דיה פתהרבוה אלי בעץ̇ קרי אלחמי ליעוד פיסכן אלבלד בעד מות אלאמאם

ולא תדנסו אלבלד אלד̇י אנתם פיה לאן אלדם ידנסה ולא יגפר לה אלדם אלד̇י ספכה אלא בדם סאפכה

ולא תנג̇סו אלבלד אלד̇י אנתם מקימון בה אלד̇י נורי סאכן פיה פאני אללה נורי סאכן פימא בין בני אסראיל