תפסיר רס"ג, במדבר ל

פקאל מוסי לבני אסראיל ג̇מיע מא אמרה אללה בה

ת̇ם כלם מוסי ריסא אלאסבאט אלד̇ין לבני אסראיל קאילא הד̇א אלאמר אלד̇י אמר אללה בה

אי רג̇ל נד̇ר נד̇רא ללה או חלף ימינא ליעקד עקדא עלי נפסה פלא יבד̇ל קולה ככל מא כ̇רג̇ מן פיה יעמל

ואיה מראה נד̇רת נד̇רא ללה או עקדת עקדא פי בית אביהא פי חאל צבאיהא

פסמע אבוהא נד̇רהא ועקדהא אלד̇י עקדת עלי נפסהא פאמסך ענהא פקד ת̇בת ג̇מיע נד̇ורהא וכל עקד עקדתה עלי נפסהא

ואן אנתהרהא אבוהא פי יום סמע ד̇לך פכל נד̇ורהא ועקדהא אלד̇י עקדתה עלי נפסהא גיר ת̇אבת ואללא יגפר להא אד̇ אנתהרהא אבוהא

ואן צארת לרג̇ל ונד̇ורהא עליהא או לפט̇ שפתיהא אלד̇י עקדתה עלי נפסהא

פסמע בעלהא פי אי יום סמע פאמסך ענהא פקד ת̇בתת נד̇ורהא ועקודהא אלתי עקדתהא עלי נפסהא

ואן אנתהרהא בעלהא פי יום סמע בד̇לך פקד פסך̇ נד̇רהא אלד̇י עליהא ולפט̇ שפתיהא אלד̇י עקדתה עלי נפסהא ואללה יגפר להא

ונד̇ר אלארמלה ואלמטלקה פג̇מיע מא עקדתה עלי נפסהא פת̇אבת עליהא

ואן כאנת קד נד̇רת פי בית בעלהא או עקדת עקדא עלי נפסהא בימין

פסמע ד̇לך בעלהא ואמסך ענהא ולם ינתהרהא פקד ת̇בתת נד̇ורהא וכל עקד עקדתה עלי נפסהא

ואן פסך̇ ד̇לך פי יום סמע בד̇לך פכל מא כ̇רג̇ מן שפתיהא מן נד̇ור ועקוד עלי נפסהא פגיר ת̇אבת ולמא פסכ̇הא בעלהא פאללה יגפר להא

וכד̇אך כל נד̇ר וכל ימין בעקד לעד̇אב אלנפס פבעלהא ית̇בת ד̇לך ובעלהא יבטלה

ואן אמסך ענהא מן יום אלי יום פקד ת̇בת ג̇מיע נד̇ורהא ועקודהא אלתי עליהא ת̇בתהא למא אמסך ענהא פי יום סמע ד̇לך

פאן פסך̇ ד̇לך בעד מא סמע בה פקד חמל וזרהא

הד̇ה אלרסום אלתי אמר אללה בהא מוסי פימא בין אלרג̇ל ומארתה ופימא בין אלאב ואבנתה פי חאל צבאיהא והי פי בית אביהא