תפסיר רס"ג, ויקרא ד

ת̇ם כלם אללה מוסי תכלימא

מר בני אסראיל קאילא אי אנסאן אכ̇טא בסהו פי שי מן פראיץ̇ אללה אלתי לא תעמל פעמל ואחדה מנהן

אן אכ̇טא אלאמאם אלממסוח עלי סביל כ̇טא אלנאס פליקרב עלי כ̇טיתה אלתי אכ̇טאהא רת̇א מן אלבקר צחיחא ללה לד̇כוה

ויאת באלרת̇ אלי באב כ̇בא אלמחצ̇ר בין ידי אללה ויסנד ידה עלי ראסה ויד̇בחה בין ידי אללה

ויאכ̇ד̇ אלאמאם אלממסוח מן דמה פידכ̇לה אלי כ̇בא אלמחצ̇ר

ויגמס אצבעה פיה וינצ̇ח מנה סבע מראר בין ידי אללה קבאלה סג̇ף אלקדס

ת̇ם יצ̇ע מן אלדם עלי ארכאן מד̇בח בכ̇ור אלאצמאג אלד̇י בין ידי אללה פי כ̇בא אלמחצ̇ר ובאקי אלדם יצבה ענד אסאס מד̇בח אלצעידה אלד̇י עלי באב כ̇בא אלמחצ̇ר

וג̇מיע שחם אלרת̇ אלד̇כוה ינזעה מנה אלת̇רב אלמגטי אלג̇וף וסאיר אלשחם אלד̇י עלי אלג̇וף

ואלכליתין ואלשחם אלד̇י עליהמא אלד̇י עלי אלאחשא וזיאדה אלכבד מע אלכלי ינזעהא

כמא ירפע מן ת̇ור ד̇בח אלסלאמה ויקתרהא אלאמאם עלי מד̇בח אלצעידה

וג̇לד אלת̇ור וג̇מיע לחמה מע ראסה ואכארעה ובטנה ופרת̇ה

ויכ̇רג̇ ג̇מיע ד̇לך כ̇ארג̇ אלעסכר אלי מוצ̇ע טאהר אלי מטרח אלרמאד ויחרקה מע חטב באלנאר עלי מטרח אלרמאד יחרק

פאן אכ̇טא ג̇מע מן ג̇מיע אסראיל וגאב אמר מן עיון אלג̇וק פיעמל ואחדה מן פראיץ̇ אללה אלתי לא תעמל פאת̇מו

ת̇ם ערפת אלכ̇טיה אלתי אכ̇טאוהא פליקרב אלג̇וק רת̇א מן אלבקר ללד̇כוה ויאת בה בין ידי כ̇בא אלמחצ̇ר

ויסנד שיוך̇ אלג̇מע אידיהם עלי ראס אלרת̇ בין ידי אללה ויד̇בח אלרת̇ בין ידי אללה

וידכ̇ל אלאמאם אלממסוח מן דמה אלי כ̇בא אלמחצ̇ר

ויגמם אצבעה פיה וינצ̇ח מנה סבע מראת בין ידי אללה קבאלה אלסג̇ף

ומנה יצב עלי ארכאן אלמד̇בח אלד̇י בין ידי אללה אלד̇י פי כ̇בא אלמחצ̇ר ובאקיה יצבה ענד אסאס מד̇בח אלצעידה אלד̇י פי באב כ̇בא אלמחצ̇ר

וג̇מיע שחמה ירפעה מנה ויקתר עלי אלמד̇בח

ויעמל בה כמא עמל בת̇ור ד̇כוה אלאמאם כד̇אך יעמל בה ויסתגפר ענהם ויגפר להם

ויכ̇רג̇ אלת̇ור כ̇ארג̇ אלעסכר פיחרקה כמא אחרק אלת̇ור אלאול הו ד̇כוה אלג̇וק

אן אכ̇טא שריף פיעמל ואחדה מן פראיץ̇ אללה אלתי לא תעמל בסהו פאת̇ם

ת̇ם עלם בכ̇טיתה אלתי אכ̇טאהא פליאת בקרבאנה עתודא מן אלמאעז ד̇כרא צחיחא

ויסנד ידה עלי ראסה ויד̇בחה פי מוצ̇ע יד̇בח אלצעידה בין ידי אללה כד̇לך מא יכון ד̇כוה

ויאכ̇ד̇ אלאמאם מן דם אלד̇כוה באצבעה ויג̇עלה עלי ארכאן מד̇בח אלצעידה וסאיר דמה יצבה ענד אסאסה

וג̇מיע שחמה יקתרה עלי אלמד̇בח כשחם ד̇בח אלסלאמה ויסתגפר ענה אלאמאם מן כ̇טיתה פיגפר לה

ואן אכ̇טא אנסאן מן עואם אלבלד סהוא פעמל ואחדה מן פראיץ̇ אללה אלתי לא תעמל פאת̇ם

ת̇ם ערף בכ̇טיתה אלתי אכ̇טא פליאת בקרבאנה מן אלמאעז צחיחה אנת̇י עלי כ̇טיתה אלתי אכ̇טא

ויסנד ידה עלי ראסהא ויד̇בחהא פי מוצ̇ע אלצעידה

ויאכ̇ד̇ אלאמאם מן דמהא באצבעה ויג̇על עלי ארכאן מד̇בח אלצעידה וסאיר דמהא יצבה ענד אסאס אלמד̇בח

וג̇מיע שחמהא ינזעה כמא ינזע שחם אלמאעז מן ד̇בח אלסלאמה ויקתרה אלאמאם עלי אלמד̇בח מקבול מרצ̇י ללה ויסתגפר לה אלאמאם פיגפר לה

ואן הו ג̇א בקרבאנה מן אלצ̇אן ללד̇כוה פליאת בהא אנת̇י צחיחה

ויסנד ידה עלי ראסהא ויד̇בחהא ללד̇כוה פי מוצ̇ע אלצעידה

ויאכ̇ד̇ אלאמאם מן דמהא באצבעה ויג̇על עלי ארכאן מד̇בח אלצעידה וסאיר דמהא יצבה ענד אסאסה

וג̇מיע שחמהא ינזעה כמא ינזע שחם אלצ̇אן מן ד̇בח אלסלאמה ויקתרה אלאמאם עלי אלמד̇בח עלי קראבין אללה ויסתגפר ענה אלאמאם ען כ̇טיתה אלד̇י אכ̇טא פיגפר לה