תפסיר רס"ג, ויקרא יד

ת̇ם כלם אללה מוסי קאילא

הד̇ה תכון שריעה אלאברץ פי וקת טהרה אן יותא בכ̇ברה אלי אלאמאם

פליכ̇רג̇ אלאמאם אלי כ̇ארג̇ אלעסכר פאד̇א נט̇ר אן אלאברץ קד אשפי מן בלא אלברץ אמר פיה במא יג̇ב

פיאמר אלאמם ויוכ̇ד̇ ללמתטהר עצפוראן חיאן טאהראן ועוד ארז וחריר קרמז וצעתר

ת̇ם יאמר אלאמאם פיד̇בח אחדהמא פי אנא כ̇זף עלי מא מן נביע

וליאכ̇ד̇ אלעצפור אלחי ועוד ארז וחריר קרמז וצעתרא ויגמס ד̇לך מע אלעצפור אלחי פי דם אלעצפור אלמד̇בוח עלי אלמא אלד̇י מן נביע

וינצ̇ח עלי אלמתטהר מן אלברץ סבע מראת ויטהרה ויטלק אלעצפור אלחי עלי וג̇ה אלצחרא

ת̇ם יגסל אלמתטהר ת̇יאבה ויחלק ג̇מיע שערה וירחץ̇ באלמא ויטהר ובעד ד̇לך ידכ̇ל אלי אלעסכר ויקים כ̇ארג̇ מנזלה סבעה איאם

פאד̇א כאן איצ̇א פי אליום אלסאבע יחלק ג̇מיע שער ראסה ולחיתה וחואג̇ב עיניה מע סאיר שערה ויגסל ת̇יאבה וירחץ̇ בדנה באלמא ויטהר

ופי אליום אלת̇אמן יקדם כ̇רופין צחיחין ורכ̇לה אבנת סנתהא צחיחה ות̇לאת̇ה עשור מן סמיד הדיה מלת̇ות̇ה בדהן ולג̇ דהן

ויוקף אלאמם אלמטהר אלרג̇ל אלמתטהר והי בין ידי אללה ענד באב כ̇בא אלמחצ̇ר

ויאכ̇ד̇ אלאמאם אחד אלכ̇רופין ליקרבה ען אלאת̇ם ואללג̇ אלדהן ויחרכהא תחריכא בין ידי אללה

ת̇ם יד̇בחה פי אלמוצ̇ע אלד̇י יד̇בח אלד̇כוה ואלצעידה פי מוצ̇ע אלקדס לאן קרבאן אלאת̇ם הו כאלד̇כוה ללאמאם מן כ̇ואץ אלאקדאס

ת̇ם יאכ̇ד̇ מן דמה ויג̇על עלי שחמה אד̇ן אלמטתהר אלימני ועלי אבהאם ידה אלימני ואבהאם רג̇לה אלימני

ויאכ̇ד̇ אלאמאם מן אללג̇ אלדהן ויצב עלי כפה אליסרי

ת̇ם יגמס אצבעה אלימני מן אלדהן אלד̇י עלי כפה אליסרי וינצ̇ח באצבעה סבע מראר בין ידי אללה

ת̇ם יצ̇ע מן באקיה עלי שחמה אד̇ן אלמתטהר אלימני ועלי אבהאם ידה אלימני ואבהאם רג̇לה אלימני עלי דם קרבאן אלאת̇ם

ואלפאצ̇ל מנה יצ̇עה עלי ראס אלמתטהר ויסתגפר ענה בין ידי אללה

ת̇ם יעמל אלאמאם אלד̇כוה ויסתגפר ען אלמטתהר מן נג̇אסתה ובעד ד̇לך יד̇בח אלצעידה

ת̇ם יצעד אלצעידה ואלהדיה עלי אלמד̇בח ויסתגפר ענה אלאמאם ויטהר

ואן כאן פקירא לא תנאל ידה ד̇לך פליקרב כ̇רופא ואחדא קרבאן אלאת̇ם ללתחריך ליסתגפר ענה ועשרא מן סמיד מלת̇ות̇ בדהן הדיה ולג̇ דהן

ושפנינין או פרכ̇י חמאם עלי מא תנאל ידה פיכון אחדהמא ד̇כוה ואלאכ̇ר צעידה

פליאת בהמא פי אליום אלת̇אמן מן אול טהרה אלי אלאמאם אלי באב כ̇בא אלמחצ̇ר בין ידי אללה

ויאכ̇ד̇ אלאמאם כ̇רוף קרבאן אלאת̇ם ולג̇ אלדהן ויחרכהא תחריכא בין ידי אללה

ת̇ם יד̇בחה ויאכ̇ד̇ מן דמה ויצ̇ע עלי שחמה אד̇ן אלמטתהר אלימני ועלי אבהאם ידה אלימני ואבהאם רג̇לה אלימני

ויצב מן אלדהן פי כפה אליסרי

וינצ̇ח באצבעה אלימני מן אלדהן אלד̇י עלי כפה אליסרי סבע מראת בין ידי אללה

ויצ̇ע באקי אלדהן אלד̇י פי כפה עלי שחמה אד̇ן אלמתטהר אלימני ועלי אבהאם ידה אלימני ואבהאם רג̇לה אלימני עלי מוצ̇ע דם קרבאן אלאת̇ם

ובאקיה יצ̇עה עלי ראס אלמתטהר ויסתגפר ענה בין ידי אללה

ת̇ם יעמל מן אלשפאנינין או מן פרכ̇י אלחמאם עלי מא תנאל ידה

תנאל ידה אחדהמא ד̇כוה ואלאכ̇ר צעידה מע אלהדיה ויסתגפר ענה בין ידי אללה

הד̇ה שריעה מן כאן בה בלא אלברץ ולם תנל ידה פי וקת טהרה

ת̇ם כלם אללה מוסי והרון תכלימא

אד̇א דכ̇לתם אלי בלד כנעאן אלד̇י אנא מעט לכם אן תחוזוה פאחללת בלא אלברץ פי בעץ̇ ביות ארץ̇ חוזכם

פליאת אלד̇י לה אלבית ויכ̇בר אלאמאם קאילא קד ט̇הר לי פי אלבית שביה בלא

ויאמר אלאמאם ליפרגו אלבית קבל אן ידכ̇ל לינט̇ר אלבלא ולא ינג̇ס ג̇מיע מא פיה ובעד ד̇לך ידכ̇ל פינט̇ר אלבית

פאן ראי אלבלא פאד̇א פי חיטאן אלבית כ̇טוט מכ̇צ̇רה או מחמרה ומנט̇רהא מתספל מן אלחאיט

פיכ̇רג̇ מן אלבית אלי באבה וליוקפה סבעה איאם

ת̇ם ירג̇ע פי אליום אלסאבע פאן כאן אלבלא קד תפשי פי חיטאן אלבית

פליאמר אלאמאם ותכ̇לע אלחג̇אר אלד̇י פיהן אלבלא ותרמי אלי כ̇ארג̇ אלקריה אלי מוצ̇ע נג̇ס

ויקשר אלבית מן דאכ̇ל מסתדירא וירמו באלתראב אלד̇י קשרוה אלי כ̇ארג̇ אלקריה אלי מוצ̇ע נג̇ס

ויאכ̇ד̇ו חג̇ארה אכ̇ר פידכ̇לוהא מוצ̇ע תלך אלחג̇ארה ותראב אכ̇ר יוכ̇ד̇ ויטין אלבית

פאן עאד אלבלא ואנתשר פי אלבית בעד מא כ̇לעת אלחג̇ארה ובעד מא קשר אלבית ובעד מא טין

פדכ̇ל אלאמאם ונט̇ר פאד̇א קד תפשי אלבלא פי אלבית פהו ברץ מאחק פי אלבית והו נג̇ס

פלינקצ̇ה מן חג̇ארה וכ̇שבה וג̇מיע תראבה וירמי ד̇לך אלי כ̇ארג̇ אלקריה אלי מוצ̇ע נג̇ס

ומן דכ̇ל אלי אלבית טול אלאיאם אלד̇י אוקפה פלינג̇ס אלי אלמגיב

ומן אנצ̇ג̇ע פיה פליגסל ת̇יאבה וכד̇אך מן אכל פיה פליגסל ת̇יאבה

פאן דכ̇ל אלאמאם פנט̇ר פאד̇א לם יתפש אלבלא פי אלבית בעד תטינה פליטהרה פאן אלבלא קד ברא

ויאכ̇ד̇ לתד̇כיתה עצפורין ועוד ארז וחריר קרמז וצעתרא

ויד̇בח אלעצפור אלואחד עלי אנא מן כ̇זף עלי מא מן נביע

ויאכ̇ד̇ אלעוד ארז ואלצעתר וחריר קרמז ואלעצפור אלחי ויגמסהא פי דם אלעצפור אלמד̇בוח ואלמא אלד̇י מן נביע וינצ̇חה עלי אלבית סבע מראת

ויד̇כי אלבית בדם אלעצפור ואלמא אלנאבע ואלעצפור אלחי ואלעוד ארז ואלצעתר ואלחריר קרמז

ויטלק אלעצפור אלחי כ̇ארג̇ אלקריה אלי וג̇ה אלצחרא ויסתגפר ען אלבית ויטהר

הד̇ה אלשריעה לג̇מיע בלא אלברץ וללכלף

ולברץ אלת̇יאב ואלמנאזל

וללשאמה וללעארצ̇ה וללבקעה

ואלפתיא פי וקת אלתנג̇יס ואלתטהיר הד̇ה שריעה אלברץ