תפסיר רס"ג, ויקרא יא

וכלם אללה מוסי והרון וקאל להמא

כלמא בני אסראיל וקולא להם הד̇א אלחיואן אלד̇י יג̇וז אן תאכלוה מן ג̇מיע אלבהאים אלתי עלי אלארץ̇

כל מט̇לפה בט̇לף ומפרק ט̇לפהא תפריקא ומצעדה אלאג̇תראר מן אלבהאים פכלוהא

ואמא הד̇ה פלא תאכלוהא מן אלמצעדה אלאג̇תראר ומן אלמט̇לפה אלאט̇לאף אלג̇מל פאנה מצעד אג̇תראר גיר מט̇לף בט̇לף והו נג̇ס לכם

ואלובר פאנה מצעד אג̇תראר גיר מט̇לף בט̇לף מחרם הו לכם

ואלארנבה פאנהא מצעדה אג̇תראר וגיר מט̇לפה בט̇לף מחרמה הי לכם

ואלכ̇נזיר פאנה מט̇לף בט̇לף וט̇לפה מפרק תפריקא והו אגתרארא לא יג̇תר מחרם הו לכם

מן לחומהא לא תאכלו ובנבאילהא לא תדנו כד̇אך הי נג̇סה לכם

והד̇א מא יג̇וז אן תאכלו מן ג̇מיע מא פי אלמא כל מא לה אג̇נחה ופלוס פי אלבחאר ואלאודיה פכלוה

וכל מא ליס לה אג̇נחה ופלוס פי אלבחאר ואלאודיה פי ג̇מיע דביב אלמא וג̇מיע אלחיואן אלד̇י פיה פהו רג̇ס לכם

וסביל כונה רג̇סא הו אן מן לחומהא לא תאכלו ובנבאילהא תרג̇סו

כד̇אך כל מא ליס לה אג̇נחה ופלוס פי אלמא רג̇ס הו לכם

והד̇א תרג̇סו מן אלטאיר ולא יוכלו לאנהא אג̇נאס אלנסר ואלעקאב ואלענקא

ואלחדא ואלצדא לאצנאפהא

וג̇מיע אלגראביב לאצנאפהא

ואלנעאם ואלכ̇טאף ואלסאף ואלבאז לאצנאפהא

ואלבום ואלזמג̇ ואלבאשק

ואלשאהין ואלקוק ואלרכ̇ם

ואלצקר ואלבגבגא לאצנאפהא ואלהדד ואלכ̇פאש

וג̇מיע דביב אלטאיר אלסאלך עלי ארבע ארג̇ל הו רג̇ס לכם

אמא הד̇ה פכלוה מן ג̇מיע דביב אלטאיר אלסאלך עלי ארבע מא לה כראעאן פוק רג̇ליה לית̇ב בהמא עלי אלארץ̇

הד̇א מא תאכלוה מנהם אלג̇ראד וצנופה ואלדבא וצנופה ואלחרג̇ל וצנופה ואלג̇נדב וצנופה

וסאיר דביב אלטאיר אלד̇י לה ארבע ארג̇ל פהו רג̇ס לכם

ומן הד̇ה פאנג̇סו כל מן דנא בנבאילהם ינג̇ס אלי אלמגיב

ומן חמל מן נבאילהם יגסל ת̇יאבה וינג̇ס אלי אלמגיב

מן ג̇מיע אלבהאים אלתי הי מט̇לפה בט̇לף ותפריקא ליסהא מפרקה ואג̇תרארא ליסהא מצעדה פהי רג̇סה לכם מן דנא בהא ינג̇ס

וכל סאלך עלי כפיה מן ג̇מיע אלוחש אלסאלך עלי ארבע פהו נג̇ס לכם כל מן דנא בנבאילהם ינג̇ס אלי אלמגיב

ומן חמל מן נבאילהם יגסל ת̇יאבה וינג̇ס אלי אלמגיב כד̇אך הי אנג̇אס לכם

והד̇א לכם אלנג̇ס מן אלדביב אלדאב עלי אלארץ̇ אלכ̇לדה ואלפאר ואלצב לאצנאפהא

ואלורל ואלחרד̇ון ואלעט̇איה ואלחרבא ואלסאם אברץ

הד̇ה אלנג̇סה לכם מן ג̇מיע אלדביב כל מן דנא בהא פי חאל מותהא ינג̇ס אלי אלמגיב

וכל מא וקע עליה מנהא בעד מותהא ינג̇ס מן ג̇מיע אניה אלכ̇שב או ת̇וב או ג̇לד או מסח וכל אניה יעמל בהא צנעה וידכ̇ל פי אלמא וינג̇ס אלי אלמגיב ויטהר

וכל אנא כ̇זף וקע מנהא שי אלי דאכ̇לה כל מא דאכ̇לה ינג̇ס ואיאה פאכסרו

מן ג̇מיע אלטעאם אלד̇י יוכל ממא ידאכ̇לה אלמא ינג̇ס וג̇מיע אלשראב אלד̇י ישרב פי כל אנא ינג̇ס

וכל מא וקע מן נבאילהם עליה פינג̇ס מן תנור ומסתוקד פאנקצוהמא לאנהא נג̇סה וכד̇אך נג̇ס יכון לכם

אמא עין וביר ומלאם אלמא פיכון טהרא ומן דנא בנבאילהא פינג̇ס

ואן וקע מן נבאילהא עלי שי מן אלנבאת ואלחב אלד̇י יזרע פהו טאהר

פאן ג̇על מא עליה ווקע מן נבאילהא עליה פהו נג̇ס לכם

ואד̇א מאת מן אלחיואן אלד̇י הו טלק לכם אן תאכלוה מן דנא בנבילתה פלינג̇ס אלי אלמגיב

ומן אכל מנהא יגסל ת̇יאבה וינג̇ס אלי אלמגיב ומן חמל מנהא יגסל ת̇יאבה וינג̇ס אלי אלמגיב

וג̇מיע אלדביב אלדאב עלי אלארץ̇ פהו רג̇ס לא יוכל

מן סאלך עלי צדרה וסאלך עלי ארבע אלי כל מא כת̇רת ארג̇לה מן ג̇מיע אלדביב אלדאב עלי אלארץ̇ לא תאכלוהם פאנהם ארג̇אס

לא תרג̇סו אנפסכם בשי מן אלדביב אלדאב ולא תתרג̇סו בהם פתעצוני בד̇לך

אנא אללה רבכם פתקדסו וכונו מקדסין פאני אלקדוס ולא תנג̇סו אנפסכם בשי מן אלדביב עלי אלארץ̇

לאני אללה אלמצעדכם מן בלד מצר לאכון לכם אלאהא פכונו מקדסין לאני אללה אלקדוס

הד̇ה שריעה אלבהאים ואלטאיר וג̇מיע אלנפוס אלחיה אלדאבה פי אלמא וסאיר אלנפוס אלדאבה עלי אלארץ̇

תפרז בין אלנג̇ס ואלטאהר ובין אלחיואן אלד̇י יוכל ואלד̇י לא יוכל