תפסיר רס"ג, בראשית ח

ד̇כר אללה נוחא וג̇מיע אלוחש ואלבהאים אלד̇ין מעה פי אלתאבות פאמר אללה בריח עלי אלארץ̇ סכן בהא אלמא

ואנסדת עיון אלגמר ורואזן אלסמא ואנחבס אלמטר מן אלסמא

ותראג̇ע אלמא ען אלארץ̇ כלמא מר רג̇ע ונקץ אלמא בעד מאיה וכ̇מסין יומא

ואסתקרת אלתאבות פי אלשהר אלסאבע פי אליום אלסאבע עשר מנה עלי ג̇באל קרדא

וכאן אלמא כלמא מר נקץ אלי אלשהר אלעאשר ופי אלואחד מנה ט̇הרת רוס אלג̇באל

ולמא כאן בעד ארבעין יומא פתח נוח כוה אלתאבות אלתי צנעהא

ואטלק אלגראב פאקאם יכ̇רג̇ וירג̇ע אלי אן יבס אלמא ען אלארץ̇

ת̇ם אטלק אלחמאמה מן ענדה לינט̇ר הל כ̇ף אלמא ען וג̇ה אלארץ̇

פלם תג̇ד אלחמאמה מסתקרא לרג̇להא פרג̇עת אליה אלי אלתאבות אד̇ כאן אלמא עלי ג̇מיע וג̇ה אלארץ̇ פמד ידה ואכ̇ד̇הא ואדכ̇להא אליה אלי אלתאבות

וצבר איצ̇א סבעה איאם אכ̇ר ועאוד אטלקהא מן אלתאבות

פג̇את אליה וקת עשא ואד̇א בורקה זיתון מקטועה פי פיהא פעלם נוח אן אלמא קד כ̇ף ען אלארץ̇

וצבר איצ̇א סבעה איאם אכ̇ר ת̇ם אטלקהא ולם תעאוד אלרג̇וע אליה איצ̇א

ולמא כאן פי סנה אחדי וסת מאיה פי אליום אלאול מן אלשהר אלאול ג̇ף אלמא ען אלארץ̇ פנזע נוח גטא אלתאבות ונט̇ר פאד̇א קד ג̇ף וג̇ה אלארץ̇

ופי אלשהר אלת̇אני פי אליום אלסאבע ועשרין מנה ג̇פת אלארץ̇

וקאל אללה לנוח קאילא

אכ̇רג̇ מן אלתאבות אנת וזוג̇תך ובנוך ונסא בניך מעך

וג̇מיע אלוחוש אלד̇ין מעך מן כל בשרי ומן אלטאיר ואלבהאים וסאיר אלדביב אלסאעי עלי אלארץ̇ אכ̇רג̇הם מעך ליתואלדו פי אלארץ̇ וית̇מרו ויכת̇רו עליהא

פכ̇רג̇ נוח ובנוה וזוג̇תה ונסא בניה מעה

וג̇מיע אלוחוש ואלטיר וסאיר אלדביב אלדאב עלי אלארץ̇ לאג̇נאסהם כ̇רג̇ו מן אלתאבות

ובנא נוח מד̇בחא ללה ואכ̇ד̇ מן בעץ̇ אלבהאים אלטאהרה ובעץ̇ אלטאיר אלטאהר וקרב צואעד עלי אלמד̇בח

פקבל אללה אלקרבאן אלמרצ̇י וקאל אללה מן ד̇אתה לא אעוד אבדא אלען אלארץ̇ איצ̇א בסבב אלאנסאן עלי אן כ̇אטר קלב אלאנסאן רדי מן צגרה ולא אעוד זיאדה אקתל כל חי כמא צנעת

אבדא טול עמר אלארץ̇ אלזרע ואלחצאד ואלקר ואלחמא ואלקיט̇ ואלכ̇ריף ואלנהאר ואלליל לא תעטל