תפסיר רס"ג, בראשית לט

ויוסף הבט בה מצר פאשתראה פוטיפר כ̇אדם פרעון רייס אלסיאפין רג̇ל מצרי מן יד אלאעראב אלד̇ין אחדרוה אלי ת̇ם

פכאן אללה מע יוסף וכאן רג̇לא מנג̇חא ואקאם פי בית מולאה אלמצרי

פלמא ראי מולאה אן אללה מעה וג̇מיע מא יעמלה אללה מנג̇חה פי ידה

וג̇ד יוסף חט̇אא ענדה פכ̇דמה ווכלה עלי מנזלה וג̇מיע מא לה ג̇עלה פי ידה

ולמא כאן מן חין וכלה עלי מנזלה וג̇מיע מא לה בארך אללה פי בית אלמצרי בג̇רירה יוסף וכאנת ברכה אללה פי ג̇מיע מא לה פי אלמנאזיל ואלצ̇יאע

תרך ג̇מיע מא לה ביד יוסף ולם ימנע ממא מעה שיא אלא אלטעאם אלד̇י יאכלה וכאן יוסף חסן אלחליה ואלמנט̇ר ג̇מיעא

ולמא כאן בעד הד̇ה אלאמור מדת מראה מולאה עיניהא אלי יוסף וקאלת צ̇אג̇עני

פאבא וקאל להא הוד̇א מולאי לם ימנע מני במא פי אלמנזל וג̇מיע מא לה קד ג̇עלה פי ידי

וליס הו פי הד̇א אלבית באכבר מני ולם יצד עני שיא אלא אנת לאנך זוג̇תה פכיף אצנע הד̇ה אלבליה אלעט̇ימה ואכ̇טא ללה

פלמא כלמתה יומא בעד יום ולם יקבל מנהא אן ינאם לצקהא אן יכון מעהא

כאן פי בעץ̇ אלאיאם דכ̇ל יוסף אלי אלבית ליצנע צנאעה לה ולם יכן רג̇ל מן אהל אלבית פיה

פתעלקת בקמיצה קאילה צ̇אג̇עני פתרך קמיצה פי ידהא והרב וכ̇רג̇ אלי אלסוק

פלמא ראת אנה קד תרך קמיצה פי ידהא וכ̇רג̇ אלי אלסוק

דעת באהל ביתהא וקאלת להם אנט̇רו כיף ג̇אנא ברג̇ל עבראני ליתלעב בנא אתא אלי ליצ̇אג̇עני פנאדית בצות עאל

פלמא סמעני קד רפעת צותי פנאדית תרך קמיצה בידי והרב וכ̇רג̇ אלי אלסוק

וודעת קמיצה ענדהא אלי אן דכ̇ל מולאה אלי מנזלה

פקאלת לה מת̇ל הד̇א אלקול אתאני אלעבד אלעבראני אלד̇י ג̇יתנא בה ליתלעב בי

פלמא רפעת צותי פנאדית תרך קמיצה פי ידי והרב אלי אלסוק

פלמא סמע כלאמהא אלתי קאלת לה כד̇א צנע בי עבדך אשתד גצ̇בה עליה

פאכ̇ד̇ה וודעה פי אלסג̇ן מוצ̇ע אסארי אלמלך מחבוסין פאקאם ת̇ם פי אלסג̇ן

וכאן אללה מעה איצ̇א ומיל אליה פצ̇לה וחקה חט̇אא ענד רייס בית אלסג̇ן

חתי ג̇על רייס בית אלסג̇ן בידה ג̇מיע אלאסארי אלד̇ין פי אלסג̇ן וג̇מיע מא כאנו יצנעון ת̇ם הו כאן ידברה

וליס רייס בית אלסג̇ן ירא שיא מנכורא ממא אללה מעה ומא יעמלה אללה מנג̇חה