תפסיר רס"ג, בראשית לז

וסכן יעקוב פי בלד סכנא אביה פי בלד כנעאן

והד̇א שרח תאליד יעקוב למא כאן יוסף אבן סבע עשרה סנה וכאן ירעי מע אכ̇ותה אלגנם וכאן נאשיא מע בני בלהה ומע בני זלפה נסוה אביה אתי יוסף בשנאעה רדיה ענהם אלי אביהם

וכאן אסראיל יחב יוסף אכת̇ר מן ג̇מיע בניה לאנה אבן שיכ̇וכ̇ה לה פצנע לה תוניה דיבאג̇

ולמא ראו אכ̇ותה אן אבאהם יחבה אכת̇ר מן ג̇מיעהם שנוה ולם יטיקו אן יסלמו עליה

ת̇ם אן יוסף ראי רויא פאכ̇בר אכ̇ותה בהא פאזדאדו איצ̇א שנאה לה

אד̇ קאל להם אסמעו אלאן הד̇ה אלרויא אלתי ראיתהא

כאנא נג̇רז ג̇רזא פי אלצחרא וכאן ג̇רזתי וקפת ת̇ם אנתצבת וכאן ג̇רזכם תחיט בהא ותסג̇ד להא

וקאלו לה אכ̇ותה אמלכא תמלך עלינא או סלטאנא תתסלט עלינא ואזדאדו איצ̇א שנאה לה עלי אחלאמה ועלי כלאמה

וראי איצ̇א רויא אכ̇רי פקצהא עלי אכ̇ותה פקאל הוד̇א ראית רויא וכאן אלשמס ואלקמר ואחד עשר כוכב תסג̇ד לי

פקץ עלי אביה ועלי אכ̇ותה פזג̇ר בה אבוה וקאל לה מא הד̇ה אלרויא אלתי ראיתהא הל נג̇י אנא ואמך ואכ̇ותך פנסג̇ד לך עלי אלארץ̇

וחסדה אכ̇ותה ואבוה חפט̇ כלאמה

ת̇ם מצ̇ו אכ̇ותה לירעו גנם אביהם פי נאבלס

פקאל אסראיל ליוסף הוד̇א אכ̇ותך ירעון פי נאבלס תעאל אבעת̇ בך אליהם קאל לה נעם

קאל אמץ̇ אעלם סלאמה אכ̇ותך וסלאמה אלגנם ורד עלי אלג̇ואב פבעת̇ בה מן עמק חברא פאתי נאבלס

פוג̇דה רג̇ל צ̇אלא פי אלצחרא פסאלה מא תטלב

קאל אנא אכ̇ותי אטלב אכ̇ברני אלאן אין הם ירעון

קאל אלרג̇ל קד רחלו מן הנא וסמעתהם יקולון נמצ̇י אלי דתן פמצ̇י יוסף ורא אכ̇ותה פוג̇דהם בדתן

פראוה מן בעיד וקבל אן יקרב אליהם אגתאלוה ליקתלוה

פקאלו בעצ̇הם לבעץ̇ הוד̇א צאחב תלך אלאחלאם קד ג̇א

אלאן פתעאלו נקתלה ונטרחה פי אחד אלאבאר ונקול וחש רדי אכלה חתי נריה מא יכון מן אחלאמה

פסמעהם ראובן וטלב אן יכ̇לצה מן אידיהם וקאל לא נקתל נפסא

ת̇ם קאל להם ראובן לא תספכו דמא אטרחוה פי הד̇א אלביר אלד̇י פי אלבר ולא תמדו ידכם אליה לקבל אן יכ̇לצה מן ידיהם לירדה אלי אביה

פלמא ג̇א יוסף אלי אכ̇ותה סלכ̇וה תוניתה תוניה אלדיבאג̇ אלתי עליה

פאכ̇ד̇וה וטרחוה פי אלג̇ב וכאן אלג̇ב פארגא ליס פיה מא

ת̇ם ג̇לסו ואכלו טעאמא פרפעו עיונהם פנט̇רו פאד̇א בקאפלה אעראב ג̇איה מן אלג̇רש וג̇מאלהם מחמלה כ̇רנובא ותריאקא ושאהבלוט מארין ליחדרו ד̇לך אלי מצר

פקאל יהודה לאכ̇ותה מא אלנפע אן נקתל אכ̇אנא ונגטי דמה

תעאלו נביעה ללאעראב וידנא לא תבטש פיה לאנה אכ̇ונא כלחמנא פקבלו מנה אכ̇ותה

פלמא ג̇אזו אלרג̇אל אלמדיניון אלתג̇אר ג̇ד̇בו יוסף ואצעדוה מן אלג̇ב ובאעוה להם בעשרין דרהמא ואתו בה אלי מצר

ת̇ם רג̇ע ראובן אלי אלג̇ב ואד̇א ליס פיה יוסף פכ̇ק ת̇יאבה

ורג̇ע אלי אכ̇ותה וקאל אלגלאם ליס הו פאנא אלי אין אמצ̇י

ת̇ם אכ̇ד̇ו תוניה יוסף פד̇בחו עתודא מן אלמאעז וגמסוהא פי דמה

ובעת̇ו בהא מע מן אתא בהא אלי אביהם וקאלו הד̇ה וג̇דנא את̇בתהא אלאן הל הי תוניה אבנך אם לא

פאת̇בתהא וקאל הי תוניה אבני וחש רדי אכלה פריסה אפתרס יוסף

פכ̇רק יעקוב ת̇יאבה ושד מסחא פי חקויה וחזן עלי אבנה איאמא כת̇ירה

וקאם ג̇מיע בניה ובנאתה ליעזוה פאבא אן יתעזי וקאל בל אנזל אלי אלת̇רא ואנא חזין עלי אבני ת̇ם בכא עליה ג̇דא

ואלמדיניון באעוה פי מצר לפוטיפר כ̇אדם פרעון רייס אלסיאפין