תפסיר רס"ג, בראשית יד

ת̇ם כאן פי איאם אמרפל מלך אלשינור ואריוך מלך אלסר כדרלעמר מלך כ̇וזסתאן ותדעל מלך אלאמם

פצנעו חרבא מע ברע מלך סדום וברשע מלך עמורה שנאב מלך אדמה ושמאבר מלך צבוים ומלך בלע הי זגר

וג̇מיע האולי אצטחבו פי מרג̇ אלסדין הו אלבחירה אלמאלחה

את̇נתי עשר סנה אטאעו כדרלעמר ופי אלת̇אלת̇ה עשרה עצוה

ופי אלסנה אלראבעה עשר אקבל כדרלעמר ואלמלוך אלד̇ין מעה פקתלו אלשג̇עא אלד̇ין פי עשתרות קרנים ואלדהאקין אלד̇ין פי הם ואלהיוביון אלד̇ין פי שוה קריתים

ואלחוריין אלד̇ין פי ג̇באל שראה אלי מרג̇ פארן אלד̇י פי טרף אלבריה

ת̇ם רג̇עו וג̇או אלי עין אלחכם הי רקים פקתלו כל מן כאן פי צ̇יעה אלעמאלקה ואיצ̇א אלאמוריין אלמקימין פי אלתפאף אלנכ̇ל

ת̇ם כ̇רג̇ מלך סדום ומלך עמרה ומלך אדמה ומלך צבויים ומלך בלע הי זגר פצאפוהם אלחרב פי עמק אלסדין

מע כדרלעמר מלך כ̇וזסתאן ותדעל מלך אלאמם ואמרפל מלך אלשינור ואריוך מלך אלסר ארבעה מלוך מע אלכ̇מסה

ועמק אלסדין פיהא אבאר תכ̇רג̇ חמרא פהרב מלך סדום ועמורה ווקעא ת̇ם ואלבאקיון הרבו אלי אלג̇בל

פאכ̇ד̇ו ג̇מיע סרח סדום ועמורה וג̇מיע טעאמהם ומצ̇ו

ואכ̇ד̇ו לוט אבן אכ̇י אברם וסרחה ומצ̇ו והו מקים פי סדום

ת̇ם ג̇א אלפלית ואכ̇בר לאברם אלעבראני והו מקים פי מרג̇ ממרא אלאמורי אכ̇י אשכול וענר והם ד̇וו עהד אברם

פלמא סמע אן קד סבי קריבה ג̇רד נצחאה אלמולודין פי מנזלה ת̇לת̇ מאיה ות̇מאניה עשר וכלבהם אלי באניאס

ותפרק עליהם לילא הו ועבידה פקתלהם וכלבהם אלי חובה אלתי ען יסאר דמשק

פרד ג̇מיע אלסרח ואיצ̇א לוט קריבה וסרחה רדהמא ואלנסא וסאיר אלקום

ת̇ם כ̇רג̇ מלך סדום תלקאה בעד רג̇ועה מן חרב כדרלעמר ואלמלוך אלד̇ין מעה אלי עמק שוה הו מלעב אלמלך

ומלכי צדק מלך ירושלם אכרג̇ לה טעאמא ושראבא והו אמאם ללטאיק אלעאלי

פבארך עליה וקאל יכון אברם מבארכא ללטאיק אלעאלי מאלך אלסמאואת ואלארץ̇.

ותבארך אלטאיק אלעאלי אלד̇י אסלם אעדאך פי ידיך פאעטאה אלעשר מן אלכל

פקאל מלך סדום לאברם אעטני אלנפוס ואלסרח כ̇ד̇ה לך

קאל לה אברם רפעת ידי חאלפא באללה אלטאיק אלעאלי מאלך אלסמאואת ואלארץ̇

מן כ̇יט אלי שסע נעל אן אכ̇ד̇ת מן ג̇מיע מאלך ולא תקול אנא אגנית אברם

גיר מא אכלה אלגלמאן ונציב אלקום אלד̇ין מצ̇ו מעי ענר ואשכול וממרא הם יאכ̇ד̇ון נציבהם