תפסיר רס"ג, שמות לו

פליצנעא בצלאל ואהליאב וכל רג̇ל חכים קלב אלד̇י ג̇על אללה פיהם חכמה ופהמא אן יערפו ויעמלו ג̇מיע צנעה עמל אלקדס כמא אמר בה אללה

ת̇ם נאדי בהמא ובסאיר אלחכמא אלד̇ין ג̇על אללה אלחכמה פי קלובהם כל מן ראי ראיה אן יתקדם אלי אלצנאעה ליעמלהא

פקבצ̇ו מן בין ידי מוסי ג̇מיע אלרפיעה אלתי ג̇או בהא בנו אסראיל לצנעה עמל אלקדס לתעמל מנהא ועאד אלקום יאתונה בבראעה פי כל גדאה

חתי אתי ג̇מיע אלחכמא אלצאנעין ג̇מיע צנעה אלקדס כל רג̇ל מן פן צנעתה אלד̇ין יצנעוהא

פקאלו למוסי הוד̇א אלקום מכת̇רון אן יאתו באפצ̇ל מן כפאיה עמל ואלצנעה אלתי אמר אללה אן תעמל

פאמר מוסי פנודי בצות פי אלעסכר יקול כל רג̇ל ומראה לא יאת בשי בעד הד̇א מן רפיעה אלקדס פאנקטע אלקום מן אלמג̇י בשי

וכאן מא אתי בה כפאיה לג̇מיע אלצנעה אן תעמל מנהא ופצ̇לא

פצנע כל חכים מן אלצנאע נפס אלמסכן עשר אשקאק מן עשר משזור ואסמאנג̇ון וארג̇ואן וצבג קרמז צורא צנעה חאד̇ק צנעהא

טול כל שקה ת̇מאן ועשרון ד̇ראעא וערצ̇הא ארבע אד̇רע מסאחה ואחדה לג̇מיע אלשקאק

וכ̇יט כ̇מס אשקאק ואחדה מע אכ̇רי וכ̇מס אשקאק ואחדה מע אכ̇רי

וצנע ערי מן אסמנג̇ון פי חאשיה אלשקה אלואחדה פי אלטרף אלמולף וכד̇לך צנע פי חאשיה אלשקה אלטרפיה אלמולפה אלת̇אניה

כ̇מסון ערוה צנעהא פי אלשקה אלואחדה וכ̇מסון ערוה צנעהא פי טרף אלשקה אלמולפה אלת̇אניה ואלערי מתקאבלה ואחדה באזא אלאכ̇רי

וצנע כ̇מסין שט̇ה מן ד̇הב וולף אלאשקאק ואחדה אלי אכ̇רי באלשט̇ט̇ פצאר אלמסכן ואחדא

וצנע אשקאקא מן מרעזי כ̇באא עלי אלמסכן אחדי עשר שקה צנעהא

טול כל שקה ת̇לת̇ון ד̇ראעא וערצ̇הא ארבע אד̇רע מסאחה ואחדה לאחדי עשר שקה

וכ̇יט אלכ̇מס אשקאק עלי חדה ואלסת שקאק עלי חדה

וצנע כ̇מסין ערוה פי חאשיה אלשקה אלואחדה אלטרפיה אלמולפה ואיצ̇א כ̇מסין ערוה פי טרף אלשקה אלמולפה אלת̇אניה

וצנע כ̇מסין שט̇ה מן נחאס ליולף אלכ̇בא ויציר ואחדא

וצנע גטאא ללכ̇בא מן ג̇לוד כבאש אדים וגטאא מן ג̇לוד דארש מן פוקה

וצנע אלתכ̇אתג̇ ללמסכן מן כ̇שב אלסנט קאימה

עשר אד̇רע טול כל תכתג̇ה וד̇ראע ונצף ערצ̇הא

ולהא ציראן מלסנאן אחדהמא באזא אלאכ̇ר כד̇אך צנע בג̇מיע תכ̇אתג̇ אלמסכן

פצנע אלתכ̇אתג̇ ללמסכן עשרין תכ̇תג̇ה מן ג̇הה מהב אלג̇נוב

וארבעון קאעדה מן פצ̇ה צנעהא תחת אלעשרין תכ̇תג̇ה קאעדתאן תחת כל תכ̇תג̇ה לציריהא וקאעדתאן תחת כל תכ̇תג̇ה לציריהא

ולג̇אנב אלמסכן אלת̇אני מן ג̇הה מהב אלשמאל צנע עשרין תכ̇תג̇ה

וארבעין קאעדה מן פצ̇ה קאעדתאן תחת כל תכ̇תג̇ה

ולמוכ̇ר אלמסכן פי אלגרב צנע סת תכ̇אתג̇

ותכ̇תג̇תאן צנעהמא לרכני אלמסכן פי אלזאויתין

פצארת מעתדלה מן אספל וג̇מיעא צארת מעתדלה מן פוקה בחלקה ואחדה כד̇אך צנע ללזאויתין כלתיהמא

פצארת תימאן תכ̇אתג̇ וקואעדהא מן פצ̇ה סת עשרה קאעדה קאעדתאן תחת כל תכ̇תג̇ה

וצנע אמהאג̇א מן כ̇שב אלסנט כ̇מסה לתכ̇אתג̇ ג̇אנב אלמסכן אלואחד

וכ̇מסה אמאהג̇ לתכ̇אתג̇ ג̇אנב אלמסכן אלת̇אני וכ̇מסה אמהאג̇ לתכ̇אתג̇ ג̇אנב אלמסכן פי מוכ̇רה גרבא

וצנע אלמהג̇ אלואסט מנהא נאפד̇א פי ג̇וף אלתכ̇אתג̇ מן אלטרף אלי אלטרף

וגשא אלתכ̇אתג̇ בד̇הב וצנע חלקהא מן ד̇הב מכאנא ללאמהאג̇ וגשא אלאמהאג̇ איצ̇א בד̇הב

וצנע אלסג̇ף מן אסמאנג̇ון וארג̇ואן וצבג קרמז ועשר משזור צנעה חאד̇ק צורא צנעה

וצנע לה ארבעה עמד מן סנט וגשאהא בד̇הב וזראפינהא מן ד̇הב וצאג להא ארבע קואעד מן פצ̇ה

וצנע סתרא לבאב אלכ̇בא מן אסמנג̇ון וארג̇ואן וצבג קרמז ועשר משזור צנעה ראקם

ועמדה כ̇מסה וזראפינהא וגשא רוסהא וטלאהא ד̇הבא וקועדהא כ̇מס מן נחאס