חולין מז.

וְאָמַר רָבָא הָנֵי תַּרְתֵּי בּוּעֵי דִּסְמִיכָן לַהֲדָדֵי לֵית לְהוּ בְּדִיקוּתָא חֲדָא וּמִתְחַזְיָא כְּתַרְתֵּי מַיְיתִינַן סִילְוָא וּבָזְעִינַן לַהּ אִי שָׁפְכָן לַהֲדָדֵי חֲדָא הִיא וּכְשֵׁרָה וְאִי לָא תַּרְתֵּי נִינְהוּ וּטְרֵפָה

וְאָמַר רָבָא חָמֵשׁ אוּנֵּי אִית לַהּ לְרֵיאָה אַפַּהּ כְּלַפֵּי גַּבְרָא תְּלָתָא מִיַּמִּינָא וְתַרְתֵּי מִשְּׂמָאלָא חַסִּיר אוֹ יַתִּיר אוֹ חֲלִיף טְרֵפָה

הָהוּא יַתִּירְתָּא דַּאֲתַאי לְקַמֵּיהּ דְּמָרִימָר הֲוָה יָתֵיב רַב אַחָא אַבָּבָא אֲמַר לֵיהּ מַאי אֲמַר לָךְ אֲמַר לֵיהּ אַכְשְׁרַהּ נִיהֲלִי אֲמַר לֵיהּ הֲדַר עַיְּילַהּ קַמֵּיהּ אֲמַר לֵיהּ זִיל אֵימָא לֵיהּ לְמַאן דְּיָתֵיב אַבָּבָא לֵית הִלְכְתָא כְּווֹתֵיהּ דְּרָבָא בִּיתֶרֶת

וְהָנֵי מִילֵּי דְּקָיְימָא בְּדָרָא דְּאוּנֵּי אֲבָל בֵּינֵי בֵּינֵי טְרֵפָה

הָהוּא בֵּינֵי בֵּינֵי דַּאֲתָא לְקַמֵּיהּ דְּרַב אָשֵׁי סָבַר רַב אָשֵׁי לְמִיטְרְפַהּ אֲמַר לֵיהּ רַב הוּנָא מָר בַּר אַוְיָא כֹּל הָנֵי חֵיוֵי בָּרָיָיתָא הָכִי אִית לְהוּ וְקָרוּ לַהּ טַבָּחֵי עֵינוּנִיתָא דְּוַורְדָּא וְהָנֵי מִילֵּי מִגַּוַּאי