תרגום תהלים סז

לְשַׁבָּחָא בִּנְגִינָתָא תּוּשְׁבַּחְתָּא וְשִׁירָתָא:

אֱלָהָא יָחוּס עֲלָנָא וִיבָרְכִנָנָא יִנְהַר זִיו אַנְפּוֹי עִמָנָא לְעַלְמִין:

לְהוֹדָעָא בְּאַרְעָא אוֹרְחָתָךְ בְּכָל עַמְמַיָא פּוּרְקָנָךְ:

יוֹדוּן קֳדָמָךְ עַמְמַיָא אֱלָהָא יוֹדוּן קֳדָמָךְ עַמְמַיָא כּוּלְהוֹן:

יֶחְדוּן וִידוּצוּן אוּמַיָא אֲרוּם תָּדֵין עַמַיָא בְּתִירוּצָא וְאוּמַיָא בְּאַרְעָא תַדְבְּרִינוּן לְעַלְמִין:

יוֹדוּן קֳדָמָךְ עַמַיָא אֱלָהָא יוֹדוּן קֳדָמָךְ עַמַיָא כוּלְהוֹן:

אַרְעָא יַהֲבַת אִבָּהּ יְבָרֵךְ יָתָן אֱלָהָא אֱלָהָנָא:

יְבָרֵךְ יָתָן אֱלָהָא וְיִדְחֲלוּן יָתֵיהּ כָּל סְיָפֵי אַרְעָא: