תרגום תהלים קלח

עַל יַד דָוִד אוֹדֵי קֳדָמָךְ יְיָ בְּכָל לִבִּי קֳבֵל דַיָנַיָא אֲזַמְרִנָךְ:

אֶסְגוֹד קֳדָם הֵיכְלָא דְקוּדְשָׁךְ וְאוֹדֵי יַת שְׁמָךְ מְטוּל טוּבָךְ וּמְטוּל קוּשְׁטָךְ אֲרוּם אַסְגֵיתָא עַל כָּל שְׁמָךְ מֵימְרֵי תוּשְׁבַּחְתָּךְ:

בְּיוֹמָא דִי קְרֵית עֲנֵי יָתִי אַסְגַעְתָּנִי בְּנַפְשִׁי עוּשְׁנָא:

יוֹדוּן קֳדָמָךְ יְיָ כָּל מַלְכֵי אַרְעָא אֲרוּם שְׁמַעוּ מֵימְרֵי תוּשְׁבַּחְתָּךְ:

וִישַׁבְּחוּן עַל כְּבִישֵׁי יְיָ אֲרוּם רַב אַיְקָרָא דַיָי:

אֲרוּם רָמָא יְיָ וּמַכִּיךְ יֶחֱמֵי לְטָב וְגֵיוְתָנָא מִן שְׁמַיָא רְחִיקִין יַמְאֵיךְ:

אִין אֲהַלֵךְ בִּמְצַע עָקְתָא תְּחַיִנַנִי עַל נְחִירָא בַּעֲלֵי דְבָבַי תּוֹשִׁיט אַיְדָךְ לְחַבָּלוּתְהוֹן וְתִפְרְקִנַנִי יְמִינָךְ:

יְיָ יַשְׁלִים בִּישָׁא עֲלַוֵיהוֹן אַמְטוּלְתִּי יְיָ טוּבָךְ לַעֲלַם עוֹבָדֵי אַיְדָךְ לָא תִשְׁבּוֹק: